Атыраулық әйел депутат болған экс-күйеуі қорлық көрсеткенін айтты

Фото: stan.kz

Атыраулық төрт баланың анасы облыстық мәслихаттың депутаты болған күйеуін  ұзақ жылдар бойы тұрмыстық зорлық-зомбылық көрсетіп, кейін алимент төлеуден қасақана жалтарғанын мәлімдеді, деп хабарлайды qandastar.kz

Атыраулық Нұржамал Тәжғалиева президентке әділдік сұрап, ашық хат жолдады.

Нұржамал Тәжғалиева күйеуі Айбар Ерекешовтен 12 жыл қорлық көріп, соққыға жығылғанын айтты.

«2018 жылы баламды емізіп жатқанда, ол ұялы телефонмен басымды жарып жіберді, ал 2023 жылы 120 келі салмағымен үстіме отырып ұрып соқты», – деді әйел.

Ол бірнеше рет полицияға арыз жазғанын, бірақ күйеуі мен ата-анасының қысымынан соң қайтарып алған. Себебі ер адам түзелуге уәде беріпті.

Ажырасқаннан кейін балаларының әкесі алимент төлемей, алты миллион теңгеге жуық қарыз болды. Нұржамалдың айтуынша, депутат алимент төлеуді сот арқылы даулауға тырысып, балаларын тартып алуды көздеп отыр. Оның үстіне үлкен қызын алдап тартып алған.

Сонымен қатар полиция Ерекешовтің әрекетін жасырып жатыр дейді. “Қорғау туралы бұйрық” әрең берілген, оның үстіне ол ер адамды да, әйелді де қорғау үшін беріліпті.

Президент Қасым-Жомарт Тоқаевқа жолдаған үндеуінде Ерекешовке қатысты қылмыстық іс қозғауға көмектесуді сұрайды.

«Әйелін ұрып-соғып, балаларының алдындағы жауапкершілігінен жалтарып, меншігіне талап қойған ер адам депутаттық лауазымға ие бола алмайды. Мен өзім және балаларым үшін әділдік сұраймын. Мемлекет мені естиді деп үміттенемін», – деді әйел.

Атырау облыстық полиция департаменті аталған оқиға бойынша тергеу амалдары жүргізіліп жатқанын айтты.

«Жарияланған фотолар 2018 және 2023 жылдары түсірілген. 1987 жылғы әйелдің айтуынша, 2018 және 2023 жылдары қорғау нұсқалары берілген, кейін арызданушының өтініші бойынша күшін жойған.

2024 жылы әйел мен оның бұрынғы күйеуінің өтініші бойынша қорғау туралы бұйрықтар шығарылды. Арызданушылардың айтуынша, олар телефон арқылы бір-бірін мазалаған”, – деді полиция.