Ауғанстан гуманитарлық апаттың шегінде тұр. Осы қыста 17 миллионнан астам адам аштықтан қаза табу қаупіне ұшырап отыр. БҰҰ-ның Дүниежүзілік азық-түлік бағдарламасы дабыл қағуда: көптеген отбасылар бірнеше күн бойы ас-су таба алмай отыр, деп жазады qandastar.kz.
WFP-нің Ауғанстандағы директоры Джон Эйлиффтің айтуынша:
«Біздің топтарымыз кейбір отбасылардың бірнеше күн қатарынан тамақ ішпейтінін, тірі қалу үшін аса ауыр шараларға баруға мәжбүр екенін көріп отыр. Балалар арасындағы өлім-жітім өсуде, ал алдағы айларда жағдай одан әрі ушығуы мүмкін».
Алда — қыс. Ел экономикасы ауыр дағдарысты бастан өткеріп жатыр, оған қоса құрғақшылық пен жер сілкіністерінің салдары да бар. Азық-түлік бұрыннан тапшы еді, енді көрші елдерден ауған босқындарының жаппай депортациялануы жағдайды одан әрі күрделендірді. WFP дерегінше, олардың көпшілігі қатты әлсіреген, ешқандай күнкөріс құралынсыз қалған.
Соған қарамастан, гуманитарлық көмек көлемі артып жатқан жоқ, керісінше қысқарып барады.
Осыған байланысты Джон Эйлифф халықаралық қауымдастыққа үндеу тастады:
«Ауғанстандағы дағдарысты қайтадан әлем назарында ұстауымыз керек. Ең осал топтағы ауған халқына олар керек көмекті алуы тиіс».
