Jańalyqtar
«Basqa memleketten aqsha alyp, elińdi jamandaý — satqyndyq»: Erlan Qarın Otanyn jamandaıtyndardyń shynaıy ómirine baǵa berdi
«Bir áleýmettik jeliden azamattyq belsendiniń sheteldegi semınarda sóılep jatqan vıdeosyn kórip, ashýlandym. Ol sheteldegi bir semınarǵa qatysyp jatyr eken. Sol jerde Qazaqstanda sońǵy jyldary jaǵdaı nasharlap ketti, azamattar óz pikirin aıta almaıdy, sóz bostandyǵy múlde joq, saıası damýymyz artqa ketip bara jatyr jáne taǵy basqa da pikir aıtqan. Zalda otyrǵandardyń barlyǵy shetel azamattary. Muny kórip ashýlanǵanym ras. Árıne, kemshilikter bar, ony eshkim joqqa shyǵaryp otyrǵan joq. Biraq barlyǵy jaman, alǵa jyljý joq, tek kerisinshe ketip bara jatyrmyz dep aıtý da jalǵan, shyndyqqa janaspaıdy. Elde demokratııanyń bar ekeniniń bir belgisi, aýyl ákimderin saılaý. Parlament pen máslıhatqa tikeleı bir mandattyq okrýgten saılanyp jatyr. Búginde Parlamentte qanshama saılaýdan ótip, halyqtyń mandatyna ıe bolyp kelgen azamattar bar. Mine, osynyń bárin qalaısha joqqa shyǵarýǵa bolady? Nemese siz ózińiz de kez kelgen azamatty áleýmettik jeliden, Youtube jelisinde ózinde qanshama saıası podkasttar shyǵyp jatyr. Menińshe, mýyzkany da, kınony da osylaı talqylamaıtyn shyǵar», — deıdi Erlan Qarın.
«Eger sóz bostandyǵy joq bolatyn bolsa, eger árbir adam óz pikiri úshin qýadalanatyn bolsa, jurttyń barlyǵy Youtube-tan saıasat týraly podkast asha ma? Kádimgideı úsh adam otyryp alyp, talqylap, synap jatady. Shyndyqqa keletin de, kelmeıtin de nárseni aıtyp jatady. Keı kezde tipti bolmaǵan jaǵdaıdy talqylap jatady. Qaýeset áńgimelerdi shyn keıipke salyp, sarapshy bolyp talqylaıdy. Tipti, jaýapkershilikti de sezinbeıdi. Sol úshin olar ne bolsa sony aıta beredi. Sóıtip otyryp syrtqa baryp, eldi jamandaıdy. Buǵan qalaısha shydaısyń? Osydan keıin qalaı syn aıtpaısyń?» — dedi memlekettik keńesshi.
Erlan Qarın jaqynda qoǵamdyq alańda júrgen bir áriptesi Qazaqstannyń kórsetkishteri jaqsy, sondyqtan halyqaralyq qor mundaı jobalardy qarjylandyrýdy azaıtatynyn aıtqanyn jetkizdi. Eldi syrtqa baryp jamandap júrgender, shyndyǵynda shalqyp ómir súrip, bıznes-klastaǵy ushaqpen ushyp, shetelde demalyp júrgen adamdar.
«О́ıtkeni, olarǵa baıaǵydaı aınalysatyn qajettilik joq. Sol sebepti qysqartylatyn kórinedi. Sol áriptesim «sizdiń ne aıtqyńyz kelgenin endi ǵana túsindim» deıdi. Shyndyǵynda da, bizdiń keıbir áriptesterimizdiń syrtqa baryp, Qazaqstandy jamandaýy, jáı ádet emes, arnaıy bir maqsat deýge bolady. Sebebi, eldi jamandasa, qarjylaryn úzbeı ala beredi. Bulardyń jaǵdaıy áli de qıyn eken, áli zertteý kerek eken, áli bir joba kerek eken deıdi. Eger jaǵdaıdyń durystyǵyn aıtsa, olarǵa qarjy berilmeıdi. Men jaǵdaıdyń shynynda solaı ekenin endi ǵana túsindim. Ol baıaǵydan solaı. Qoǵamdyq alańda júrgen keıbir áriptesterdi bilemin, 20-30 jyl ótti, aıtatyn áńgimeleri bir. Biraq osy Qazaqstanda júredi, syrtqa bıznes-klaspen ushyp barady. Shetelde qydyryp júredi, mysaly biz olaı júrmeımiz. Shetelde júredi, paıdany osy elde tabady, syrtqa baryp Qazaqstandy jamandaıdy. Osydan keıin qalaı synamaısyń? Sosyn elde júrgen tilshilerdi táýelsiz emes dep aıtady. Shyn máninde olardy da basqa eldiń úkimeti qorlar arqyly qarjylandyryp otyr eken. Shyndyqty da talap etetin bolsaq, ádil bolaıyq. Birdeı talap qoıaıyq. Sonda ǵana týra jolmen júremiz», — deıdi ol.
