جاڭالىقتار
باسشىلىق كوپ, جالاقى از: Air Astana بورتسەرىكتەرى جۇمىس جاعدايلارىن ايتىپ شاعىمداندى
فوتو: turproezdka.ru
Air Astana كومپانياسىنىڭ بورتسەرىكەرى جالاقىلارىنىڭ ازدىعىن ايتىپ نارازىلىق تانىتتى. ولار شاعىمدارىن 12 ماۋسىمدا eotinish پورتالىنا جاريالاعان. ەرەۋىل مەن نارازىلىققا شىعۋعا رۇقسات جوق دەگەن قىزمەتكەرلەر ەندى باسشىلىقتىڭ وسى ءۇشىن جۇمىستان شىعارۋى مۇمكىن ەكەنىن جەتكىزدى. بۇل تۋرالى Stan.kz اقپارات اگەنتتىگى Qaz365.kz پورتالىنا سىلتەمە جاساپ حابارلايدى.
قىزمەتكەرلەردىڭ ايتۋىنشا ولار وسىعان دەيىن ءوز ۋاجدەرىن اشىعىنان ايتا الماعان. سەبەبى كومپانيا نارازىلىققا شىعۋعا شەك قويعان. سول سەبەپتى ولار eotinish پورتالىنا جاريالاۋعا ءماجبۇر بولعان. دەگەنمەن قازىر Air Astana-دا شاعىم اۆتورلارىن تابۋ ماقساتىندا ىزدەۋ باستالعان. ولار جۇمىستان شىعارىلامىز با دەپ الاڭداپ وتىرعانىن جەتكىزدى.
«بىزگە ەرەۋىلگە شىعۋعا زاڭمەن تىيىم سالىنعاندىقتان وز ماسەلەلەرمىز جايلى باسقاشا ايتا المايمىز. قاتارداعى بورتسەرىكتىڭ ەڭبەكاقىسى 240 مىڭنان 320 مىڭ تەڭگەگە دەيىن قۇرايدى. بۇل رەتتە قر ۇلتتىق ستاتيستيكا بيۋروسىنىڭ دەرەكتەرى بويىنشا 2024 جىلدىڭ ءبىرىنشى توقسانىندا ورتاشا ايلىق اتاۋلى جالاقى 382 279 تەڭگەنى قۇرادى. سونىمەن قاتار, قر ەڭبەك كودەكسىنىڭ 105-بابىنىڭ 1-تارماعىنا سايكەس اۋىر جۇمىستارمەن, زياندى نەمەسە قاۋىپتى ەڭبەك جاعدايلارى بار قىزمەتكەرلەرگە ەڭبەكاقى تولەۋ جوعارى مولشەردە بەلگىلەنەدى», — دەلىنگەن حابارلامادا.
قىمەتكەرلەر سونىمەن قاتار زەينەتكە شىعۋ جاسىنا دا كوڭىلدەرىنىڭ تولمايتىنىن جەتكىزدى. 2023 جىلى قابىلدانعان الەۋمەتتىك كودەكستە اۋىر جۇمىستارداعى قىزمەتكەرلەر ەرتە زەينەتكە شىعىپ, ارنايى الەۋمەتتىك تولەم الۋعا قۇقىعى بار.
قىزمەتكەرلەر باسشىلىق تاراپ پەن كادر ساياساتىن دا سىنعا الدى.
«بىزدە ۆيتسە-پرەزيدەنتتەر, مەنەدجەرلەر تىم كوپ. شەتەلدىك باسشىلىق بار, ولاردىڭ جالاقىسى قازاقستانداعىداي ەمەس. قازىر كومپانيانىڭ شتاتى 5000-نان اسادى. ال بورت قىزمەكەرلەرى نەبارى 25. بۇل 1 ۇشاققا 200 ادامدى قۇرايدى. كومپانيا ءوزىن ەڭ جاقسى جۇمىس بەرۋشى دەپ قاراستىرعانىمەن, قىزمەتكەرلەر مۇلدە باسقا پىكىردە”, – دەپ قوستى ولار.
قىزمەتكەرلەر بونۋس رەتىندە جۇرەتىن قىزمەتتىك بيلەتتەرگە دە شاعىمىن جەتكىزدى. ايتۋلارىنشا مۇنداي بيلەتتەردى پايدالانۋدا بورتتاردىڭ ۇنەمى جۇكتەلۋىنە بايلانىستى ۇشۋعا مۇمكىندىك جوق. ال كەيدى باسشىلاردىڭ باسىمدىعىنا بايلانىستى قاراپايىم جۇمىسشىلار 4-5 كۇن كەزەكتە تۇرۋعا كەيدە قوسىمشا شىعىنداردى كوتەرۋگە ءماجبۇر بولادى ەكەن.
«جىل بويى دەرلىك بورتتاردى جۇكتەۋ ارقىلى كومپانيانىڭ 2023 جىلعى سالىقتى ەسەپتەەمەگەندەگى كىرىسى 68,7 ميلليون دوللاردى قۇرادى. بىراق كومپانيا قىزمەتكەرلەرىنە سىياقى دا بەرمەدى. سامۇرىق-قازىنا كومپانيالارىندا سىياقى پايداعا قاراماستان توقسان سايىن ءبىر جالاقى مولشەرىندە تولەنەدى. ال بىزدە ەگەر كومپانيا بولجامدى پايدا بويىنشا جوسپاردى ورىنداسا عانا ورىندالادى. ونىڭ وزىندە دەڭگەيدى باسشىلىق بەلگىلەيدى. كوپتەگەن قىزمەتكەرلەر جالاقىعا ريزا ەمەس. باسقا كومپانيالارعا كەتۋگە ءماجبۇر. كومپانيا قىزمەتكەرلەردى جولسەرىكتەردى باعالامايدى. ايتپەسە مۇنداي شاعىم بولماس تا ەدى. قازىر بورتسەرىكتەر تاپشى. كوبىسى جۇمىستان كەتۋگە دايىندالىپ جاتىر. ءتىپتى 3 جىلدىق كەلىسىمشارتتى مەرزىمىن تولق اتقارماسا دا”, — دەپ جازدى بورت سەرىكتەر.
كەين Air Astana كومپانياسى بورتسەرىكتەر شاعىمىنا بايلانىستى پىكىر ءبىلدىردى.
“اۆياكومپانيادا بورتسەرىكتىڭ اي سايىنعى جالاقىسى ار ۇشۋ ساعاتتارىمەن ەسەپتەلەدى. سونىمەن قاتار, ولار ءىسساپاردا بولعان كەزدە تاۋلىكتىك اقى مەن جول اقىسى ءۇشىن قوسىمشا قاراجات الادى. بورتسەرىكتەردىڭ جالاقىسى جانە باسقا دا قوسىمشا تولەمدەر جىل سايىنعى نەگىزدە قايتا قارالادى. جالاقى اۆياكومپانياداعى جۇمىس وتىلىنە جانە كاسىبي ەڭبەگىنە بايلانىستى ەسەپتەلەدى», — دەلىنگەن اۆياكومپانيانىڭ جاۋابىندا.
كومپانيا سونىمەن قاتار بورتسەرىكتەردىڭ جۇمىس كەزىنە 4-5 جۇلدىزدى قوناقۇيلەردە تۇرۋىن قامتاماسىز ەتەتىنىن دە قوسا كەتتى.
“ۇشۋ قۇرامىنىڭ ەڭبەك جانە دەمالىس, سونداي-اق زەينەتكە شىعۋ جاعدايلارى قر ەڭبەك زاڭناماسىمەن قاتاڭ رەتتەلگەن. اۆياكومپانيا باسشىلىعى بورتسەرىكتەردىڭ وتىنىشتەرىن نازارعا الادى جانە ەكيپاجدار مەن باسقا دا قىزمەتكەرلەردىڭ ەڭبەك جانە دەمالىس جاعدايلارىن ودان ءارى جاقسارتۋ جونىندەگى جوسپاردى ازىرلەيدى», — دەلىنگەن ۆەدومستۆونىڭ جاۋابىندا.
