بەلگىلى پەداگوگ: عاني بەيسەمباەۆ قىزمەتىنەن كەتسىن

فوتو: halyq-uni.kz

ءبىلىم سالاسىنداعى وزەكتى پروبلەمالاردى كوتەرىپ جۇرگەن مامان جانە ۇستاز اياتجان احمەتجان «Kultobe» پودكاستىندا وقۋ-اعارتۋ مينيسترلىگىنىڭ جۇمىسىن سىنادى, — دەپ حابارلايدى Massaget.kz تىلشىسى.

اياتجان احمەتجاننىڭ ايتۋىنشا, وقۋ-اعارتۋ مينيسترلىگىنىڭ قابىلداعان كەي وزگەرىستەرى جەمقورلىقتىڭ ورشۋىنە اكەلۋى مۇمكىن.

«ايماعامبەتوۆتىڭ كەزىندە بولعان ناقتى ەكى وزگەرىسكە توقتالايىن. اسحات ايماعامبەتوۆ وقۋشىنى قالانىڭ ىشىنەن ءبىر وڭىرگە توقساننىڭ ۇزىلىسىنەن باسقا ۋاقىتتا اۋىستىرۋعا بولماۋ تۋرالى نورما قويىپ تاستادى. بيىل ونى الىپ تاستادى. ونى الىپ تاستاۋ قانداي ماسەلە تۋدىرادى? مىسالى, جەكەمەنشىك مەكتەپتەر ءار ايدىڭ 15-ءى كۇنى مەملەكەتكە وزىندە وقىپ جاتقان بالا جايلى ءتىزىم وتكىزەدى. ال ەندى ەرتەڭ جەكەمەنشىك مەكتەپتەر مەملەكەتتىك مەكتەپتەردەن بالانى اكەلەدى دە, 10 كۇن تۇرعىزادى دا, ونى اتا-اناسى دا بىلمەي قالادى, قايتىپ وزىنە جىبەرىپ تاستايدى. مۇنداي جەمقورلىق فاكتىلەرى تۋادى. سوسىن 25 مامىر ساباق بىتەدى, 23 مامىر كۇنى اۋىسىپ تۇرعانىنا تاڭعالۋدىڭ قاجەتى جوق. تارتىپكە كەلىپ قالىپ ەدى, سول ءتارتىپتى قايتادان بۇزىپ جىبەردى», — دەيدى ۇستاز.

مامان جاعىمسىز سالدارعا اكەلۋى مۇمكىن تاعى ءبىر وزگەرىس جايلى ايتىپ بەردى.

«1 سىنىپقا وقۋشى قابىلداۋدى زاڭمەن 31 شىلدەدە اياقتايتىن ەتىپ ەدى. ونى قازىرگى مينيستر عاني بەيسەمباەۆ قايتادان 31 تامىزعا ىسىرىپ تاستادى. ول نە نارسەگە اكەلەدى? جۇرت 31 شىلدەگە دەيىن قۇجاتىن تاپسىرىپ بولادى, مەكتەپ ديرەكتورى تامىز ايىندا «مەنىڭ مەكتەبىمە قانشا وقۋشى كەلدى» دە, وقۋلىعىن, كابينەتىن جانە مۇعالىمىن دايىندايدى. ەندى قازىر قالادا ديرەكتور تامىزدىڭ سوڭىنا دەيىن نەشە سىنىپ اشىلاتىنىن بىلمەي وتىرادى. سوسىن 1 قىركۇيەكتە ساباق باستالادى, نە وقۋلىق جەتىسپەيدى, ال ارتىق وقۋلىق الىپ قويسا, مەملەكەت «نەگە ارتىق وقۋلىق الاسىڭ, قارجىنى ءتيىمدى پايدالانبادىڭ» دەپ قىسادى. مۇنى ديرەكتور بولعان ادام عانا تۇسىنەدى. سوندىقتان دا قوعامدا قىزۋ تالقىلانبايدى», — دەيدى ول.

ول جاڭا وقۋ جىلىندا جاڭا مينيستر كورگىسى كەلەتىنىن جاسىرمادى.

«دۇرىس جۇيەگە تۇسكەن نارسەنى قۇرتىپ جاتسا, مەن قالاي قازىرگى ءمينيستردىڭ جۇمىسىن دۇرىس باعالايمىن? مەن عاني بەيسەمباەۆتىڭ قىزمەتىنەن كەتكەنىن قالايمىن. جاڭا وقۋ جىلىندا جاڭا مينيستر كورگىم كەلەدى. قورىقپاي, جۇرت سىناسا دا, دۇرىس شەشىم قابىلداي الاتىن مينيستر كورگىم كەلەدى», — دەيدى اياتجان احمەتجان.