Bloger Álisher Elikbaevtyń salyqshylardy sotta jeńgeni ras pa?

Foto: ınstagram

Memlekettik kirister komıteti sotta komıtettiń bloger Álisher Elikbaevtan jeńilgeni jaıly aqparatty joqqa shyǵardy, dep habarlaıdy qandastar.kz

Osy jyldyń aqpan aıynda áleýmettik jelide kóptegen blogerlerdiń salyqty tólemegeni týraly aqparat tarady. Olardyń arasynda Elikbaev ta bar edi.

Orda.kz jazǵandaı, bloger máseleni sot arqyly sheshýdi jón kórgenin aıtyp áleýmettik jelisinde jazba jarııalady. Ol eshqashan salyq zańnamasyn buzbaǵanyn aıtty. Onyń sózinshe, ózine aýdarylǵan qaıyrymdylyq aqshalarynyń bári tıisti ornyna jumsalǵan.

Iaǵnı, onyń shotyndaǵy úlken aýdarymdardyń bir bóligi qaıyrymdylyqqa — balalar hospısterine arnalǵan reanımobılderge, búırek transplantaııasy boıynsha otalarǵa, Ýkraınaǵa jabdyqtar satyp alýǵa jumsalǵan. Osylaısha ol bul qarajattyń barlyǵy tikeleı qorlarǵa, emhanalarǵa jiberilgenin málimdedi.

Osy jazbasyn negizge alǵan tilshiler jańalyqtar jaza bastady. Aqyry áleýmettik jelide sot memlekettik kirister komıtetiniń áreketin zańsyz dep tapqany jáne blogerdiń sotta jeńgeni týraly aqparat tarady.

Memlekettik kirister komıteti bul jaıly bylaı dedi:

«Áleýmettik jelilerde bloger Álisher Elikbaevtyń memlekettik kirister organdaryn sotta jeńip shyqqany jóninde aqparat taratylýda. Bul shyndyqqa sáıkes kelmeıdi.
Sot onyń talabyn máni boıynsha qaraǵan joq jáne memlekettik kirister organdarynyń áreketterin zańsyz dep tanyǵan joq.
2025 jylǵy 15 tamyzdaǵy jaǵdaı boıynsha, memlekettik kirister organdarynyń áreketterin zańsyz dep taný týraly nemese ózge de sot sheshimderi men joldanǵan habarlamalar joq.
Memlekettik kirister organdarynyń áreketterin zańsyz dep taný jóninde taratylyp jatqan aqparat shyndyqqa sáıkes kelmeıdi.
BAQ ókilderinen tekserilmegen derekterdi jarııalaýdan bas tartýdy suraımyz», — dep málimdedi memlekettik kirister komıtetiniń baspasóz qyzmeti.

Aıta keteıik, búgin, 15 tamyz kúni Toqaev zańǵa ustazdardyń quqyǵyn qorǵaý jóninde ózgerister engizýdi usyndy.