Болат Назарбаевқа тиесілі болған зауыттың мүлкі мемлекетке өтті

Фото: ашық дереккөз

Марқұм Болат Назарбаевқа тиесілі болған Алматы ауыр машина жасау зауытының жылжымайтын мүлкі өз меншігіне қайтарылды. Бұл туралы Бас прокуратура хабарлады, деп жазды qandastar.kz

Ақпаратқа сәйкес, олар – 97 гектар жер мен жалпы аумағы 80 мың шаршы метрді құрайтын 94 ғимарат.

Бұған дейін Алматы қаласының прокуратурасы зауыт мүлкі заңсыз сатылғанын анықтаған. Содан кейін Мемлекеттік мүлік және жекешелендіру комитеті сотқа мәмілелерді жарамсыз деп тану туралы шағым тастаған.

Мәлімет боынша, сот талапкердің талабын қанағаттандырды, апелляциялық соты шешімді күшінде қалдырған.

Айта кетсек, Болат Назарбаев зауыттың 31,9%-ы акциясын 2023 жылдың наурызында мемлекетке қайтарған еді. Бұл зауыт акцияларын экс-президенттің туған бауыры  заңсыз иемденілген актив ретінде қайтарды.

Сонымен қатар Қарасай аудандық соты «Барыс» базары орналасқан жерді сату келісімшарттарын жарамсыз деп тапты. Прокурор жалпы көлемі 35 гектардан асатын жер телімдерін сату келісім-шарттарын жарамсыз деп тануды талап еткен.