Адам саудасы: Жан-Клод Ван Даммға қатысты қылмыстық іс қозғалды

Бельгиялық актер Жан-Клод Ван Дамм Румынияда адам саудасына байланысты басталған кең ауқымды тергеу аясында күдікке ілінді. Бұл туралы   Qandastar.kz CNN және Antena 3 телеарналары хабарлады.

Румынияның ұйымдасқан қылмыс пен лаңкестікке қарсы күрес басқармасы (DIICOT) 64 жастағы актерге адам саудасының құрбаны болған бірнеше әйелмен сексуалдық қарым-қатынасқа түсті деген айып тағылып отыр.

Тергеу деректеріне сәйкес, Ван Дамм адам саудасына байланысты күдікке ілінген бірнеше адаммен кездескен, олар оған «сыйлық ретінде» бес румын моделімен жыныстық қатынасқа түсуді ұсынған. Солардың бірі, модельдік агенттіктің иесі, румын кәсіпкері Морел Болеа деген болжам бар.

Оқиға Канн қаласында болғаны айтылғанымен, нақты уақыты көрсетілмеген. Жәбірленушілердің бірінің адвокаты Адриан Кукулистің айтуынша, Каннда Жан-Клод Ван Дамм ұйымдастырған іс-шара кезінде, Румынияда қылмыстық топ құрды және жеңгетайлықпен айналысты деген күдікпен тергеліп жатқан бірнеше адам актерге фотомодель румын әйелдерін ұсынған.

«Ол әйелдердің қандай жағдайда екенін актер жақсы білген», – деді адвокат Кукулис.

Бұл оқиға Румыния прокуратурасы 2020 жылы бастаған адам мен кәмелетке толмағандарды саудалау ісіне қатысты тергеудің бір бөлігі саналады.

Бұл оқиға Францияда болғандықтан, Румыния тарапы күдіктілерді шақырту үшін Францияның Кассациялық сотының рұқсатын алуға тиіс.