Dekerttik járdemaqy alý úshin jalǵan qujat rásimdegender sottaldy

Júktilik pen bosaný kezinde beriletin áleýmettik tólemderdi zańsyz taǵaıyndaǵandar anyqtaldy, dep habarlaıdy Qandastar.kz  Qarjylyq monıtorıng agenttigine silteme jasap.

Agenttik 2024–2025 jyldar aralyǵynda 1,2 mlrd teńge zalal keltirgen 13 sotqa deıingi tergeý júrgizdi.

«Júktilik jáne bosaný boıynsha járdemaqylardy zańsyz taǵaıyndaý derekteri boıynsha 10 is tergelip, olardyń zańsyz shemalardy uıymdastyrǵan 15 adam jaýapqa tartyldy», — delingen agenttik habarlamasynda.

Jalǵan jumyspen qamtý arqyly 385 júkti áıelge shyndyqqa saı kelmeıtin málimetter negizinde járdemaqy taǵaıyndalyp, bul memleketke 1 mlrd teńgeden astam shyǵyn keltirdi.

«Aqtóbe oblysynda Úmirbekova men Baımurzaeva 70 júkti áıeldi 29 jeke kásipkerlikke jalǵan túrde jumysqa ornalastyryp, 487 mln teńge bıýdjet qarjysyn jymqyrǵany úshin 6 jylǵa bas bostandyǵynan aıyryldy», — deıdi agenttiktegiler.

Shymkent qalasynda Dúısenova osyǵan uqsas qylmys jasap, memleketke 98 mln teńge zalal keltirgeni úshin 5 jylǵa sottaldy.

Anyqtalǵan barlyq iste qylmystyń jasalý tásili birdeı bolǵan.

«Qaskúnemder júkti áıelderdi arnaıy qurylǵan jeke kásipkerlikterge jalǵan jumysqa ornalastyryp, ótken kúnmen eń joǵary áleýmettik jáne zeınetaqy aýdarymdaryn rásimdegen», — dep atap ótti qarjy monıtorıng agenttigi.

Ataýly áleýmettik kómekke bólingen bıýdjet qarajatyn urlaý faktileri boıynsha da 15 jumyspen qamtý jáne áleýmettik baǵdarlamalar bólimderiniń laýazymdy tulǵalaryna qatysty 3 sotqa deıingi tergeý bastaldy.

Urlaý shemasy bas býhgalterdiń senimdi tulǵalardy áleýmettik kómek alýshylar tizimine engizýinen turǵan. Bul adamdar áleýmettik osal topqa jatpaǵan.

Osy derekter negizinde tólem tapsyrmalary rásimdelip, basshylyqpen bekitilgennen keıin qarajat jalǵan tulǵalardyń shottaryna aýdarylyp, qolma-qol aqshaǵa aınaldyrylyp, sybaılastar arasynda bólingen.