Мәжіліс депутаты Бақытжан Базарбек Алматыдағы даулы «Швейцария» тұрғын үй кешеніне қатысты қылмыстық істі қайта қарауды талап етті. Оның айтуынша, ондаған азамат зардап шеккен бұл оқиғада Отбасы банк қызметкерлерінің жауапкершілігі әлі күнге дейін қаралмаған, деп жазады qandastar.kz
Депутаттың мәліметінше, кешендегі бес үйдің әрқайсысы бес қабатты, ол бау-бақшаға арналған жер теліміне салынып, қажетті құжаттар мен рұқсаттарсыз тұрғызылған. Соған қарамастан, тек құрылысшы қамауға алынды.
«Қамауға алынған тек мердігер. Бірақ неге тек ол тергелуде? Неге күдіктілер арасында Отбасы банкінің жауапты тұлғалары жоқ?» — деп мәлімдеді Базарбек.
Оның айтуынша, құрылысқа қатысты қылмыстық іс 2022 жылы қозғалған, ал 2023 жылы сот бүкіл кешенді сүру туралы шешім шығарған. Отбасы банк проблемалық нысан екенін біле тұра, пәтерлерді сатып алу үшін несие рәсімдеп, клиенттермен келісімшарттарды жалғастыра берген. Нәтижесінде шамамен 50 үлескер баспанасыз қалу қаупіне тап болды.
«Отбасы банкінің лауазымды тұлғаларын кім қорғап отыр? Олар да құрылысшы сияқты қазір тергеу изоляторында болуы керек емес пе?» — деді депутат.
