Депутат үй кезегіндегі азаматтарға уақытша баспана беруді ұсынды

Уәкілетті органның ақпаратына сәйкес республика бойынша тұрғын үй кезегіне 647 117 адам тұр.Соның ішінде, Астана қаласында – 40 мың адам, Алматы қаласында – 43 мың адам, Түркістан облысында – 62 мың адам, Ақтөбе облысында – 36 мың адам кезекте тұр. 2024 жылға республикалық бюджеттен 5090 пәтерді салуға 69,3 млрд теңге қаражат бөлінген. Сонымен қатар 7 522 пәтерімен кредиттік тұрғын үйді салуға 87 млрд теңге қарастырылған. Ол тек кезекте тұрған адамдар санының 2% ғана тұрғын үймен қамтамасыз етеді. “Абай облысында 19373 азамат тұрғын үй кезегінде тұр. Соның ішінде, Семей қаласында 14 000 адам. Семей қаласында азаматтарды қабылдағанда көптеген азаматтар тұрғын үй мәселесін көтерді. Жалғызбасты, көпбалалы аналар, мүгедектігі бар жандар келді. Көп жылдар кезекте тұрған азаматтар бар. Тұрғын үйге мұқтаж азаматтардың жағдайы қиын, тұрақты тұратын үйлері жоқ. Алған кредиттері бар, тұрғын үй бағдарламаларына қатысу мүмкіндігі жоқ, алғашқы жарнаны төлей алмайды”, – дейді Сабильянов. Сөзінше, қабылдауда болған азаматтар кезектен үй алғанға дейін уақытша тұратын үй, жатақхана беруді ұйымдастыру туралы ұсыныс айтқан. “Жалпы, кезекте тұрғандарды тұрғын үймен қамтамасыз етуді жақсарту бағытында Парламент Мәжілісі тиісті заңдарға өзгерістер енгізіп, жергілікті атқарушы органдарға дайын тұрғын үйлерді сатып алу құзыреті берілді. Қаражат бөлінсе, кезекте тұрған адамдарға үй алу мүмкіндігі артады. Сондай-ақ «Заңсыз иемденілген активтерді мемлекетке қайтару туралы» Заңға сәйкес мемлекетке қайтарылған қаражат әлеуметтік жобаларға, тұрғын үймен қамтамасыз етуге де жұмсалуы қажет, – деп атап өтті мәжілісмен. Депутат мынадай ұсыныс жасады: республикалық бюджеттен тұрғын үй салуға қосымша қаражат бөлу; заңсыз иемденілген активтердің мемлекетке қайтарылған қаражатының бір бөлігін тұрғын үй құрылысына және жаңа үйлерді сатып алуға жұмсау; 3 жылдық республикалық бюджеттен жергілікті бюджетке субвенция бергенде тұрғын үй салуға, сатып алуға қажетті қаражат қарастыруды; тұрғын үй салуға бағалы қағаздар шығару арқылы қаражат тарту; кезекте тұрған азаматтарды тұрғын үй кезегі келгенге дейін уақытша тұратын үймен қамтамасыз ету мәселелерін қарастыруды сұрады.