«Eger óltiretin bolsam, ony jibermes edim»: Berdenovti atqan sottalýshy úkimmen kelispeıtinin jetkizdi

Shymkent qalasy ákiminiń orynbasary Rýslan Berdenovke qastandyq jasaǵany úshin sottalǵan Ernar Jıembaı úkimmen kelispeıtinin aıtty, dep habarlaıdy Qandastar.kz Stan.kz-ke silteme jasap.

Sottalýshy óltirý nıetim bolsa, jibermes edim deıdi.

«Úkimmen kelispeımin. О́ltirý nıetim bolmaǵan. Muny Rýslan Arystanbekulynyń qorqynyshtan aıtyp jatqan sandyraǵy dep oılaımyn. Eger óltiretin bolsam, ol kisini jibermes edim. Sot úkimi adam óltirý nıetinsiz, Qylmystyq kodekstiń 106-baby (Densaýlyqqa qasaqana aýyr zııan keltirý) boıynsha dep kúttim. Sebebi naqty aıaqtalǵan qylmys densaýlyǵyna aýyr zııan kelgeni. Bıologııalyq ólim bolǵan joq», — deıdi sottalýshy.

Ol ázirge apellıaııalyq shaǵym túsiretinin ıa túsirmeıtinin sheshpegenin aıtty.

“Ázirge naqty aıta almaımyn. Kelinshegim týraly eshteńe aıtpaımyn. Berdenovke ota jasalǵaly jatyr eken. Ony qazir aıtyp, qan qysymyn kótergim kelmeıdi. Negizi ol kisi meni birinshi shaqyrdy. Sebepsizden sebepsiz dórekilik tanytty. “Aqymaqsyń, shashyń túsip qalǵan” dep aıtyp, jaǵama jarmasty. Bul sózdi onyń kómekshisi, qurylys bóliminiń bastyǵy da rastady. Berdenov bólim bastyǵyna: «Jıembaıdy meniń kómekshimmen dóreki qylyq kórsetkeni úshin túrmege toǵytamyn» dep aıtty. Al sizder oǵan mán bermedińizder”, – dedi sottalýshy.

Ernar Jıembaı kezdesýge birinshi Berdenovtiń ózi shaqyrǵanyn aıtty.

“Onymen kezdesýge tyrystym. Sebebi ol Forbes tizimindegi adam, bıliktiń eń joǵary eshelonyna jaqyn. Onyń sottalýymdy talap etpeýin jáne aramyzda eshqandaı janjal bolmaýyn qaladym. Sol úshin kezdesýge bardym. Ol kezdesýge meni ózi shaqyrdy. Sosyn: «Áıeliń anaý-mynaý, seni túrmege jabamyn» degen sózder shyqty. 21 sáýirde ózi telefon soqty. Ol meni ózi shaqyrdy ǵoı. Jaraıdy, kónemiz ǵoı endi”, – dedi Ernar Jıembaı.