Денсаулық сақтау министрлігі вирустық инфекциялар мен тұмау жағдайларының өсуіне байланысты эпидемияға қарсы алдын алу шараларын күшейтті, деп хабарлайды qandastar.kz
Республикада жыл сайын 3-4 миллионға дейін ЖРВИ жағдайы және шамамен 2 мың тұмау жағдайы тіркеледі. Биылғы эпидемиологиялық маусымның басынан бері (1 қыркүйектен бастап) 1 461 819 ЖРВИ жағдайы есепке алынды. Бұл көрсеткіш өткен маусымға қарағанда 20%-ға аз (2024-2025 жылдарда 1 678 904 жағдай тіркелген). Алайда соңғы аптада тіркелген 183 074 ЖРВИ жағдайы өткен жылдың осы аптасымен салыстырғанда 16%-ға артты.
Тұмаудың 590 зертханалық расталған жағдайы тіркелді: 587 жағдай А типі (H3N2, яғни «Гонконг тұмауы»), ал 3 жағдай — А типі (H1N1). Биыл тұмау ағымы 41-аптада (қазанның бірінші жартысы) басталды, бұл өткен маусымға қарағанда ертерек. Қазақстанда бұрын кездеспеген жаңа тұмау штамдары анықталған жоқ.
ЖРВИ мен тұмау белгілері бар пациенттер қосымша вирустарға да тексеріледі: риновирус, парагрипп, аденовирус, бокавирус, коронавирус, РС вирусы және метапневмовирус белсенді айналымда.
Аурудың жалпы құрылымында балалар (0-14 жас) 66%-ды, ересектер 34%-ды құрайды. Соңғы аптада оқушылар арасында 6 мыңнан астам ЖРВИ және 13 тұмау жағдайы тіркелді, яғни білім беру ұйымдарындағы балалардың шамамен 4%-ы сырқаттанған.
Тұмауға қарсы егу шаралары жалғасуда: қазіргі таңда 2,1 миллион адам вакцинацияланды. Вакцина ағымдағы штамдардан, оның ішінде А (H3N2) қорғауды қамтамасыз етеді.
Эпидемияға қарсы шаралар аясында:
- Медициналық ұйымдарға кіреберісте «сүзгі» ұйымдастырылып, температуралық бақылау мен дезинфекция күшейтілді; санитарлық жағдай тұрақты қадағаланады.
- Сырқаттанушылық артқан жағдайда қосымша инфекциялық төсек дайын тұр.
- Вирусқа қарсы препараттар, ыстықты төмендететін дәрілер, жеке қорғаныс құралдары және дезинфекциялық заттардың жеткілікті қоры бар.
Білім беру мекемелерінде балалардың сырқаттанушылығы күнделікті бақылауда, таңертеңгі «сүзгі» жүргізіледі, температуралық және дезинфекциялық режим сақталады.
Қазіргі таңда стационарларда 10 829 инфекциялық төсектің 76%-ы жұмыс істеп тұр. Қазіргі эпидемиологиялық жағдайға байланысты инфекциялық бөлімшелерде шамадан тыс жүктеме жоқ, қажет болған жағдайда төсек қоры жеткілікті.
Министрлік азаматтарды профилактикалық шараларды сақтау үшін шақырады: көп адамдар жиналатын орындардан аулақ болу, үй-жайларды жиі желдету, қолды антисептикпен тазалау және ауру белгілері байқалғанда балаларды үйде қалдыру.
