Ерлан Қошанов кибералаяқтарды қалай тоқтатуға болатынын айтты

Фото:qaz365.kz

Парламент Мәжілісінің төрағасы Ерлан Қошанов депутаттарға кибералаяқтыққа қарсы заң жобасын дайындауды тапсырды, деп хабарлайды,  деп хабарлайды qandastar.kz

Мәжіліс төрағасы Ерлан Қошановтың айтуынша, бүгінде алаяқтардың қоңырау шалмаған немесе күмәнді хабарлама жібермеген адам кемде-кем.

«Бүгін талқыланған негізгі тақырып – кибералаяқтық мәселесі болды. Ол түсінікті де.  Соңғы уақытта цифрлық ортадағы қылмыстардың ауқымы да, одан туындайтын қауіп-қатер де едәуір артып келеді. Сондықтан сөз сөйлеген депутаттар өте орынды мәселе көтеріп отыр. Бірақ біз кінәліні ғана іздемей, мәселенің шешу жолын қарастыруымыз керек. Қазіргі кезде кибералаяқтар қоңырау шалмаған немесе күмәнді хабарлама жібермеген адам қалмаған шығар. Мұндай келеңсіз үрдіс тек Қазақстанды ғана емес, бүкіл әлемді жаулап алды. Президенттің бұл мәселе бойынша тиісті тапсырмасы бар. Елімізде бұған қарсы күрес жүргізіліп жатқанына қарамастан, киберқылмыстар әлі де толастамай тұр.    Сондықтан бүгінгі күні киберкеңістікте жауапкершілікті одан әрі күшейту маңызды. Кибершабуылдардың басым бөлігі шетелден келетіні және трансұлттық сипатта болатыны түсінікті. Бірақ бұл жерде жауапкершілік осы тізбектің барлық қатысушысына бірдей қарастырылуы керек», – дейді Е. Қошанов.

Ерлан Қошановтың сөзінше, киберкеңістіктегі кибералаяқтық үлкен ауқым алып кеткен. Өйткені көптеген кибершабуыл шетелден ұйымдастырылып, трансұлттық сипатқа ие. Дегенмен бұл тек қылмыстық топтарға ғана емес, осы жүйенің барлық қатысушыларына да жауапкершілік жүктеуге тиіс.

«Яғни, алаяқтық схемаларды ұйымдастырушылар ғана емес, оған ықпал ететіндер де қатаң жауапқа тартылуға тиіс. Ол – мобильді операторлар, қаржы ұйымдарының қызметкерлері, дропперлер және басқа да қатысушылар. Бұл туралы жаңа депутаттар айтты. Мәселе бүгін ғана көтеріліп отырған жоқ. Бұған дейін де бірнеше мәрте уәкілетті органдарға депутаттық сауалдар жолданған еді. Осыған ұқсас мәселелер бұған дейін де шешімін тапты ғой. Естеріңізде болса, кезінде мал ұрлығы ел арасында дүрбелең туғызды», – дейді ол.

Мәжіліс төрағасы Ерлан Қошанов кибералаяқтықтың жолын кесу үшін қылмыстық жауапкершілікті барынша күшейту қажет екенін де баса айтты.

«Броконьерлер мәселесі де ушығып тұрған болатын. Біз әрқайсысы бойынша жекелеген нормалар қабылдап, қылмыстық жауапкершілікті күшейттік. Сол арқылы аталған мәселелерге тосқауыл қойдық. Қыз ұрлау да – ушыққан мәселе. Депутаттар көтеріп, ол мәселе бойынша да заңды қатайтуды қарастырып жатырмыз. Енді, міне, кибералаяқтықпен де күресті күшейтіп, қылмыстық жауапкершілікті барынша қатаңдатуға тиіспіз. Заңды күшейтпей, халыққа қолайсыздық туғызып отырған алаяқтардың әрекетін тоқтату мүмкін емес. Сондықтан тиісті комитетке шұғыл түрде тиісті заң жобасын дайындауды тапсырамын. Оған жаңа бастама көтерген депутаттар да атсалысады деп ойлаймын», – деді ол.