Қызылорда облысының әкімі Нұрлыбек Нәлібаев экс-президент Нұрсұлтан Назарбаевты үлгі тұта ма деген сұраққа нақты жауап бермеді, деп хабарлайды qandastar.kz сайты kznews.kz-ке сілтеме жасап.
«Қызылорда облысының әлеуметтік-экономикалық дамуы туралы» атты брифингте журналист Серік Жолдасбай әкімнің «Википедиядағы» өмірбаянында бұрын Назарбаевты үлгі тұтатыны жазылғанын, ал кейін бұл дерек алынып тасталғанын айтып, өзгерістің себебін сұрады.
Нұрлыбек Нәлібаев бұл сауалға:
Есімде жоқ, шынымды айтсам, – деп қысқа жауап берді.
Брифинг модераторы сұрақтың тақырыпқа сай еместігін айтып, оны жалғастыруға мүмкіндік бермеді.
Айта кетсек, Нұрлыбек Нәлібаев марқұм мемлекет қайраткері, экс-президенттің сенімді серігі болған Бердібек Сапарбаевтың інісі.
