حاسان قاسىمباەۆ ىسىنەن پروكۋرور شەتتەتىلدى

فوتو:Dalanews.kz

حاسان قاسىمباەۆ ىسىندە ايىپتالۋشىلاردىڭ ادۆوكاتتارى پروكۋرورعا قارسىلىق (وتۆود) جاريالادى, دەپ حابارلايدى  qandastar.kz   Dalanews.kz-كە سىلتەمە جاساپ.

قورعاۋشىلاردىڭ ايتۋىنشا, پروكۋرور نازگۇل تاۋكەنباي بۇعان دەيىن بۇل ءىستى ءبىرىنشى ساتىداعى سوتتا قاراۋعا قاتىسقان.

سۋديا قارسىلىق جونىندەگى ءوتىنىشتى قاراۋ ءۇشىن ءۇزىلىس جاريالادى.

ارتىنشا حاسان قاسىمباەۆ ىسىنەن پروكۋرور شەتتەتىلدى.

مەملەكەتتىك ايىپتاۋشى نازگۇل تاۋكەنباي ءىستى ءبىرىنشى ساتىداعى سوتتا قاراۋ كەزىندە قاتىسقان. سوندىقتان سۋديا قورعاۋ تارابىنىڭ وتۆود جونىندەگى ءوتىنىشىن قاناعاتتاندىردى.

تاۋكەنباي سوت زالىنان شىقتى.

بۇگىن حاسان قاسىمباەۆقا قاتىستى سوت باستالدى.

بۇل ءىس تالعار اۋداندىق سوتىندا قارالىپ جاتىر.

ءىستى سۋديا ايناگۇل تۇكىباەۆا قاراپ جاتىر. ايىپتالۋشىلار ورىندىعىندا حاسان قاسىمباەۆتان بولەك تاعى بەس ادام بار. پروتسەسس مەملەكەتتىك تىلدە اشىق تۇردە ءوتىپ جاتىر.

ەسكە سالايىق, حاسان قاسىمباەۆ بىلتىر قاماۋعا الىنعان بولاتىن. كەيىن پوليتسيا مالىمدەمە جاساپ, حاسان قاسىمباەۆتىڭ ۇستالۋى شەرزاتتىڭ ولىمىنە بايلانىستى ەمەس ەكەنىن حابارلادى.

پد مالىمەتىنشە, قاسىمباەۆ 2 قاراشادا ۇستالىپ, ۋاقىتشا ۇستاۋ يزولياتورىنا قاماۋعا الىنعان. ول ارمان ءالىموۆتى ۇرلاپ, دەنساۋلىعىنا اۋىر زيان كەلتىردى دەگەن كۇدىككە ىلىنگەن.

وقيعا 2021 جىلى ماۋسىمدا بولعان.