Жуырда ғана орамалын шешкен блогер Эммануэлла Науызбаева ашық көйлегі үшін қоғам тарапынан қатты сынға ұшырады, деп жазады qandastar.kz
Ақтөбедегі мешітте болған дау-дамайдан кейін елге кеңінен таныла бастаған қазақстандық блогер әлеуметтік желідегі парақшасында жаңа жылдық кешке арналған образын көпшілікке ұсынып, фотосурет жариялаған.
«Сұлулық – қауіпті күш. Әсіресе адам әдемі болып дүниеге келсе», – деп жазды ол.
Алайда бұл жазба желі қолданушыларының ашуын тудырды.
Кейбір пікір иелері:
«Орамалды шештіңіз, түсінеміз, әртүрлі себеп болуы мүмкін. Бірақ ұзақ уақыт хиджаб киіп, артынша бір ай өтпей ашық-шашық киіну – орамал сіз үшін ешқашан маңызды болмағанын көрсетеді», «Жалған тақуалық жеңіл жүрістен де жаман», «Ешқашан орамалды шешпеймін деп уәде берген еді, енді тек шешіп қана қоймай, ашық киініп жүр», «Нағыз бет-бейнесі енді көрінді», «Бұл – шектен шығу, осындайлар дінді бұзады», «Иманның әлсірегені байқалады, орамалды шешуге сылтау іздегендей», – деп сынға алды.
Сонымен қатар, блогерді қорғаған пікірлер де кездесті.
Қолдаушылардың бірі: «Жарайсың, айыптауға болмайды. Хиджабты шешу – жамандықтың белгісі емес, бұл әр адамның жеке таңдауы. Жастық шақ өмірден ләззат алу үшін беріледі», – десе, енді бірі: «Оған тыныштық беріңіздер. Әр адам өз ісі үшін өзі жауап береді. Біреудің ашық киінуі барлығымызды тозаққа сүйрейді деген сөз емес», – деп жазды.
Тағы бір пікірде:
«Алға, қызым! Жассың, сұлусың, орынсыз айыптауларға мән берме. Өмір бір-ақ рет беріледі, оны қалай өткізу – өз еркің», – деген қолдау сөздер айтылды.
