«ينتيم سۋرەتتەرىڭدى جاريالايمىن»: ورالدا ەر ادام بۇرىنعى سۇيىكتىسىن 3 جىل بويى بوپسالاپ كەلگەن

ورال تۇرعىنى ءۇش جىل بويى بۇرىنعى سۇيىكتىسىنەن اقشا بوپسالاعان, دەپ حابارلايدى Qandastar.kz.

23 جاستاعى ەر ادام قىزىمەن اجىراسىپ كەتكەن سوڭ, ولاردىڭ ورتاق وتكەنىن اقشا تابۋ كوزىنە اينالدىرعان.

وسى ۋاقىت ىشىندە جاس جىگىت بۇرىنعى سۇيىكتىسىن ينتيمدىك سۋرەتتەرىن جەلىگە جاريالايمىن دەپ قورقىتىپ, ءۇش جىل بويى بوپسالاعان.

سول ارقىلى ول قىزدان جالپى سوماسى 9 ميلليون تەڭگەدەن استام اقشا العان.

ونى كەزەكتى 150 مىڭ تەڭگە الىپ جاتقان ساتىندە ۇستادى.

«بوپسالاۋ فاكتىلەرى بانك اۋدارىمدارى مەن مەسسەندجەردەگى حات الماسۋلار ارقىلى دالەلدەندى. كۇدىكتى كەزەكتى 150 مىڭ تەڭگەنى الىپ جاتقان ساتىندە قولعا ءتۇستى. اتالعان فاكتى بويىنشا قىلمىستىق ءىس قوزعالدى, ال ۇستالعان ازامات ۋاقىتشا ۇستاۋ يزولياتورىنا قاماۋعا الىندى. قازىرگى ۋاقىتتا تەرگەۋ امالدارى جۇرگىزىلۋدە, تەرگەۋ بارىسى دەپارتامەنت باسشىلىعىنىڭ باقىلاۋىندا», – دەپ حابارلادى پوليتسيا دەپارتامەنتى.

سونداي-اق ۆەدومستۆو كەز كەلگەن بوپسالاۋ فاكتىسى ورىن العان جاعدايدا قۇقىق قورعاۋ ورگاندارىنا دەرەۋ جۇگىنۋ قاجەتتىگىن ەسكە سالدى. قىلمىسكەرلەردىڭ تالابىنا كونبەۋ كەرەك جانە ماسەلەنى ءوز بەتىنشە شەشۋگە تىرىسۋدىڭ قاجەتى جوق – بۇل جاعدايدى ودان ءارى ۋشىقتىرۋى مۇمكىن.