«Йоу, орыстар» деген әнді шырқаған алматылық белсенді 10 тәулікке қамауға алынды

Фото: ашық дереккөз

Алматының әкімшілік соты белсенді Мария Кочневаны музыкалық фестивальде «Йоу, орыстар» деген әнді шырқағаны үшін 10 тәулікке қамауға алды. Бұл туралы Stan.kz ақпарат агенттігі хабарлайды.

Сот Кочневаны ұсақ бұзақылық жасағаны үшін кінәлі деп тапты. Оның үстінен ұсақ бұзақылық бабы бойынша іс қозғалып, әкімшілік сотқа жіберілді. Бап бойынша 10 АЕК (36,9 мың теңге) көлемінде айыппұл салу немесе он тәулікке дейін әкімшілік қамаққа алу қарастырылған.

«Мен өз сөзімде ешқандай жаман ниет айтқан жоқпын. Бұл шын мәнінде TikTok желісінде трендтегі ән. Мен оның мазмұнын білмеймін», – деді Кочнева.

Айта кетейік, бұған дейін Алматы қаласының тұрғыны Мария Кочнева фристайл рэпте ресейліктерге қарсы ән шырқағаны үшін Алмалы аудандық ішкі істер бөліміне шақырылған еді.

Қыздың досы Темірлан Еңсебектің сөзінше, Марияны полиция департаментіне соғысқа қарсы ән шырқағаны үшін шақырған.

Еңсебек бұл әнді Кочнева екеуі Украинадағы соғысты еске түсіру үшін ойлап тапқанын айтқан еді.

Кочнева орындаған ән Украинада соғыс басталғаннан кейін трендке айналған. БАҚ-та танымал болғаны сонша, ән барлық әлеуметтік желілерде бірінші орынға ие болған.