Қамшыбек Қоңқабаев жаңа қызметке кіірсті

Фото: sports/kz

Белгілі қазақстандық боксшы, Олимпиада ойындарының жүлдегері Қамшыбек Қоңқабаев жаңа қызметке тағайындалады, деп жазды qandastar.kz

Бұл туралы Қызылорда облыстық Дене шынықтыру, спорт және туризм басқармасының басшысы Бақтияр Артаев өңірлік коммуникациялар қызметінде өткен брифинг барысында айтты.

– Өңірде боксты дамытуға барынша бет бұрамыз. Өздеріңізге белгілі, жуырда 81 келі салмақ дәрежесінде Азамат Бектас ел чемпионы атанды. Бұл жетістікті одан әрі жандандыруымыз қажет. “Тарлан” бокс кешенін мемлекеттің балансына алуды жоспарлаудамыз. Егер де бұл жұмысымыз ойдағыдай аяқталса, Сыр өңірінің мақтанышы Қамшыбек Қоңқабаевты жұмысқа қабылдап, жұмысты одан әрі жандандырамыз. Сонымен қатар Тұрсынбай Құлахмет секілді жас мамандарды да шәкірт тәрбиелеу жұмысына тартып жатырмыз, – деді Бақтияр Артаев.

Жыл басында Қазақстан құрамасының бас жаттықтырушысы Қайрат Сәтжанов Қамшыбек Қоңқабаевтың спорттағы мансабы аяқталғанын айтқан еді. 91 келіден жоғары салмақта жұдырықтасқан боксшы мансап жолында Токио Олимпиадасының қола жүлдегері, екі дүркін ӘЧ күміс жүлдегері (2017, 2019), үш рет Азия чемпионатының күміс (2017, 2019, 2021) жүлдегері атанды.