Қандастарды анықтау ережесі жеңілдетіледі

Бұл туралы qandastar.kz хабарлады.

«Қосымшадағы ережеге сәйкес, үміткерлердің жеке басын куәландыратын құжаттарда тиісті жазба болмаған жағдайда оларды Қазақстан Республикасының азаматтығына оңтайландырылған (тіркеу) тәртібімен анықтау қағидалары бекітілсін», – делінген Еңбек және халықты әлеуметтік қорғау министрлігінің бұйрығында.

Өтінішті Migration.enbek.kz порталы, «Құтты мекен» мобильді қосымшасы арқылы халықты әлеуметтік қорғау және жұмыспен қамту мәселелері жөніндегі жергілікті атқарушы орган немесе Қазақстан Республикасының шетелдегі мекемесі арқылы өмірбаянымен (еркін нысанда) және тұрақты тұратын елдің шетелдік паспортының көшірмесі ұсына отырып, жіберу қажет.

Өтінішті қарау үшін атқарушы орган арнайы комиссия құрады. Оның құрамына  көші-қон, білім беру, мәдениет, ішкі саясат, ҰҚК салаларында еңбек ететін жергілікті атқарушы органдардың өкілдері кіреді.

Сонымен қатар ішкі істер органдары, этникалық қазақтардың мәселелерімен айналысатын үкіметтік емес ұйымдар немесе қоғамдық бірлестіктер, сондай-ақ қазақ тілі және Қазақстан тарихы саласын жетік білетін сарапшылар құрамда қамтылған.

Комиссия мынадай алгоритм бойынша жұмыс жүргізеді:

1) жеке басын растаудан басқа, өтініш берушінің ұлты қазақ екенін растайтын қосымша ұсынылған құжаттарды қарау;

2) қазақ тілін, салт-дәстүрін, әдет-ғұрпын, мәдениетін, туыстық қатынасын және адамның өзін этникалық қазақ ретінде тануға мүмкіндік беретін басқа да факторларды білуге ​​бағытталған жеке немесе онлайн сұхбат жүргізу;

3) алынған ақпаратты талдау және бағалау;

4) қазақ ұлтына жататынын анықтау немесе анықтаудан бас тарту туралы ұсыным.

«Ұлты қазақ екенін анықтау үшін өтініш беруші халықты әлеуметтік қорғау және жұмыспен қамту мәселелері жөніндегі жергілікті атқарушы органға қосымша туу туралы куәлікті, ата-анасының туу туралы куәлігін, ата-бабасының Қазақстан аумағында тұруы туралы мұрағаттық анықтамаларды, неке қию туралы куәлікті, егер, бар және өтініш берушінің ұлты қазақ екенін растайтын басқа да құжаттар», – делінген құжатта.

Ата-анасының ұлты әртүрлі болған жағдайда, өтініш беруші «Неке (ерлі-зайыптылық) және отбасы туралы» Қазақстан Республикасы Кодексінің 65-бабының 2-тармағына сәйкес өзінің азаматтығын анықтайды және көрсетеді.

Қазақ ұлтын танудан бас тартуға мыналар негіз болып табылады:

1) этникалық қазақ қазақ ұлтына жататынын тану үшін ұсынған құжаттардың және (немесе) олардағы деректердің (мәліметтердің) дұрыс еместігін не олардың жоқтығын анықтау;

2) «Дербес деректер және оларды қорғау туралы» Қазақстан Республикасы Заңының 8-бабына сәйкес көзделген этникалық қазақтың дербес деректерге қол жеткізуге келісімінің болмауы.