Қарағанды облысында жоғалып кеткен 13 жастағы жасөспірім аман-есен табылды, деп хабарлайды Qandastar.kz. Бұл туралы ІІМ-нің баспасөз қызметі мәлімдеді. Полицияның айтуынша, баланың өмірі мен денсаулығына қауіп төніп тұрған жоқ.
Қарағанды облыстық ТЖД өкілдері хабарлағандай, бүгін сағат 12:05-те мобильді топ еріктілер жоғалған баланы Абай қаласынан 15 км қашықтықтағы далада тапқан. Баланың медициналық көмекке қажеттілігі болмаған.
Алдын ала ақпаратқа сәйкес, жасөспірім достарымен бірге Абай қаласынан Қарабас кенті бағытына жаяу шыққан. Теміржол өткелі маңында балалар екіге бөлініп, екі жасөспірім өз үйлеріне қайтқан. Туыстарының айтуынша, бала соңғы рет шамамен сағат 20:00-де анасына хабарласып, бағдарынан адасып қалғанын айтқан.
Баланың жоғалғаны туралы хабарлама соңғы байланысынан бірнеше сағат өткеннен кейін түскен, бұл іздестіруді қиындатқан.
Іздестіру-құтқару жұмыстарына ТЖМ, ТЖМ-нің 52859 әскери бөлімі, полиция департаменті, жергілікті атқарушы органдар, туыстары, волонтерлер мен жергілікті тұрғындар қатысқан. Сонымен қатар, әуеден шолу үшін ТЖМ-нің «Қазавиақұтқару» тікұшағы пайдаланылған.
Еске салсақ, жасөспірім 2012 жылы туған және 1 сәуір күні үйінен шыққан кезде жоғалған.