Қарағанды құю-машина жасау зауытының (КЛМЗ) ұжымы Қазақстан Республикасының жаңа Конституция жобасына қолдау білдірді. «Қазақмыс» Корпорациясы құрамындағы кәсіпорын өкілдері құжат 2026 жылғы 15 наурызда жалпыұлттық референдумға ұсынылатынын атап өтті.
Қызметкерлердің пікірінше, өндірістегі тәртіп пен жауапкершілік секілді қағидалар мемлекет басқаруында да айрықша маңызға ие. Заң үстемдігі, ашықтық, азаматтардың құқықтарын құрметтеу және қоғамдық мүдденің тепе-теңдігі – ел дамуының басты негізі. Жаңа Конституция жобасы осы құндылықтарды бекітіп, әділ қоғам қалыптастыруға және тұрақты дамуға бағытталған.
Ұжым референдумды азаматтық көзқарасты білдірудің маңызды мүмкіндігі деп санайды. Олардың айтуынша, мемлекеттің ертеңі әр адамның белсенділігі мен жауапкершілігіне тікелей байланысты.
Сондай-ақ зауыт қызметкерлері референдумға қатысу елдің құқықтық және әлеуметтік негізін нығайтуға қосылған үлес екенін жеткізді. Жаңа Конституция болашақ ұрпақтың өмір сапасына әсер ететін стратегиялық құжат ретінде бағаланады.
КЛМЗ ұжымы өз ұстанымын білдіре отырып, «Қазақмыс» Корпорациясына тән жауапкершілік, адалдық және ортақ іске үлес қосу қағидаттарын қолдайтынын мәлімдеді. Олар қазақстандықтарды референдумға белсенді қатысуға және жаңа Конституция жобасын қолдауға шақырды.
