Қарағанды қаласының 26 жастағы тұрғыны Маңғыстау облысының аумағында қолға түсті. Ол бірқатар алаяқтық фактілері бойынша күдікке ілінген. Zakon.kz мәліметіне сілтеме жасаған Qandastar.kz сайты бұл туралы хабарлады.
Қарағанды облысы полиция департаментінің Қазыбек би атындағы полиция бөліміне пластик терезе мен балкон орнатуға тапсырыс берген тұрғындардан бірнеше шағым түскен.
Тергеу нұсқасына сәйкес, күдікті өзін пластик терезе орнату шебері ретінде таныстырып, клиенттерден тапсырыс қабылдаған. Қызмет көрсетуге келісіп, алдын ала төлем алған соң, байланысқа шықпай, міндеттемесін орындамаған. Нәтижесінде азаматтар уәде етілген қызметке қол жеткізе алмай, ал күдікті өңірден кетіп қалған.
Жедел-іздестіру шаралары барысында полицейлер оның орналасқан жерін анықтап, Маңғыстау облысындағы жалдамалы пәтерлердің бірінен ұстады.
Тергеу барысында 32 алаяқтық дерегі белгілі болып, олардың барлығы бір қылмыстық іске біріктірілді. Келтірілген жалпы шығын көлемі 20 миллион теңгеге бағаланды.
Қазір күдікті қамауға алынып, сотқа дейінгі тергеу амалдары жүргізілуде. Полиция азаматтарға сақ болуды ескертіп, кез келген қызметке алдын ала төлем жасамас бұрын орындаушының жеке басы мен құжаттарын мұқият тексеруге кеңес береді.
