Қаржы министрлігінде өткен алқалы жиында бизнесті қолдау тетіктерін күшейту және мемлекеттік басқаруға цифрлық шешімдерді енгізу мәселелері талқыланды. Бұл ақпаратты Zakon.kz сайтына сілтеме жасап Qandastar.kz сайты жариялады.
Кездесуде Мемлекет басшысы Қасым-Жомарт Тоқаевтың экономиканы цифрландыру, кәсіпкерлікті дамыту және бюджет қаражатын тиімді әрі ашық пайдалану жөніндегі тапсырмаларын іске асыру барысы қаралды.
Вице-премьер – Ұлттық экономика министрі Серік Жұманғарин стратегиялық міндеттерді орындауда мемлекеттік органдардың үйлесімді жұмысының маңыздылығын атап өтті. Оның айтуынша, былтыр Қазақстанның жалпы ішкі өнімі 300 млрд АҚШ долларынан асып, жан басына шаққандағы көрсеткіш 15 мың долларға жеткен. Бюджет-салық реформасы мемлекеттік қаржыны шоғырландыруға бағытталса, алдағы кезеңде шығыстарды оңтайландыру және бюджеттік бағдарламаларды қайта қарау Қаржы министрлігіне жүктеліп отыр.
Қаржы министрі Мәди Такиев жаңа Конституция жобасы мен алдағы референдумның маңыздылығына тоқталып, Ата заңда әділетті қоғам құру, заң алдындағы теңдік, теңгерімді экономика және азаматтардың мүддесіне жұмыс істейтін мемлекет қағидаттары бекітілгенін айтты. Ол ведомство қызметінің басты мақсаты – халықтың өмір сүру сапасын арттыру екенін жеткізді.
Қоғамдық кеңестің жұмысы да талқыланып, оның ұсыныстары министрлік тарапынан толық қарастырылғаны атап өтілді. Ынтымақтастықтың нәтижесінде 2025 жылы мемлекеттік бюджеттің кірісі (трансферттерді қоспағанда) 24,6 трлн теңгеге жетіп, жоспар 100,1 пайызға орындалған.
2026 жылға республикалық бюджетке салық түсімдері 18,9 трлн теңге көлемінде бекітілді, бұл өткен жылмен салыстырғанда айтарлықтай жоғары көрсеткіш. Бюджет кірістерінің өсуіне экономикалық даму, жаңа Салық кодексі, әкімшілендіру жүйесін жетілдіру және цифрландыру шаралары ықпал етеді.
2025 жылы іске қосылған «Мемлекеттік қаржының цифрлы картасы» жобасы бюджет кірістері мен шығыстарын географиялық тұрғыдан талдауға мүмкіндік береді. Жоба фискалды деректерді, өңірлік көрсеткіштерді және тәуекелдерді біріктіріп, қаржылық процестердің ашықтығын арттыруға бағытталған. Биыл жасанды интеллект негізіндегі талдау платформасын толық енгізу жоспарланған.
Бизнеске қолайлы жағдай жасау мақсатында «таза парақтан» қағидаты бойынша микро және шағын кәсіпкерлікке бір реттік қолдау шарасы іске асырылып, бірқатар тексерулерге уақытша мораторий енгізілді. Сонымен қатар көлеңкелі экономиканы азайту, мемлекеттік сатып алу мен аудит жүйесін жетілдіру, цифрлық теңгені кеңінен қолдану және мемлекеттік мүлікті басқаруды оңтайландыру бағытында жұмыстар жүргізілуде.
Жиын соңында қатысушылар 2026 жылдың стратегиялық реформаларды іске асыруда маңызды кезең екенін атап өтіп, қаржы жүйесін цифрлық трансформациялау, жасанды интеллектіні енгізу және бюджет қаражатын ашық басқару басты басымдық болып қала беретінін жеткізді.
