«Qatty qorqamyn»: Sherzat Polattyń máıitin teksergen Halımnazarov jurt bilmeıtin shyndyǵyn aıtty

Foto: Vıdeodan skrınshot

Sherzat Polat pen Núkenovanyń máıitin teksergen táýelsiz sarapshy Tahır Halımnazarov ómirde neden qorqatynyn aıtty, dep habarlaıdy Qandastar.kz aqparat portaly Azattyq Rýhy-na silteme jasap.

Ol marqum Sherzat Polattyń ákesi Qarjaýbaı Nurymovtyń advokaty Meıirman Shekeevpen birge suhbat barysynda ómirdegi qorqynyshyn aıtty.

«О́mirińiz máıithanada ótti, júregińiz bar eken ǵoı deıdi. Men odan qoryqpaımyn. Biraq qorqynyshty kınolar men bıiktikten qorqamyn. Úshinshi qabattan joǵary turatyn týysym bar, qonaqqa shaqyrsa, barmaımyn. О́ıtkeni, bilmeımin, sondaı bir sezim bar. Balkonnan tómen qaraǵanda jaman bolyp ketemin. Sol sııaqty jer silkinisinen de qorqamyn. Sol kúni (red. – Sherzat Polat sotyndaǵy jer silkinisi) meni kútkendeı, men sóılep jatqanda azdap qorqyp kettim», — deıdi Tahır Halımnazarov.

О́z kezeginde Meıirman Shekeev sot barysyndaǵy oqıǵaǵa qatysty óz oıyn jetkizdi.

«Jurt máıitten qorqyp qashyp júrse, bul kisi onyń ortasynda júredi. Sol kúni jer silkinip jatsa da suraǵymdy tezirek qoıyp, jaýabymdy alý maqsatym bolatyn. Sýdıaǵa aıtyp qoıamyn «Bismillá» dep ary qaraı ura bereıik deımin», — dedi Meıirman Shekeev.