Qazaq qyzy «Ázirbaıjan daýysy – 2025» baıqaýynyń fınalyna ótti

2025 jyldyń 18 mamyrynda Atyraý qalasynan shyqqan 20 jastaǵy Sanat Asýat «Ázirbaıjan daýysy – 2025» halyqaralyq mýzykalyq shoýynyń jartylaı fınalynda tamasha óner kórsetip, baıqaýdyń fınalyna joldama aldy. Joba bastalǵaly beri kórermenderdiń ystyq yqylasyna bólenip kele jatqan Sanatty Qazaqstan halqy zor úmitpen qoldap otyr. Bul – onyń ónerine arnalǵan beınerolıkterdiń astyndaǵy júzdegen pikirden-aq baıqalady, dep jazady Qandastar.kz saıty Skifnews.kz aqparat portalyna silteme jasap. 

Atalǵan baıqaý bıyl aqpan aıynda bastalyp, tórtinshi maýsymda basty sahnaǵa shyǵý úshin Ázirbaıjan, Qazaqstan, Grýzııa, Túrkııa, Reseı jáne Ýkraına elderinen kelgen talantty vokalıster baq synaýda.

Sanat – Qazaqstannan qatysyp jatqan jalǵyz ónerpaz. Ol «Kórmeı tyńdaý» kezeńinen bastap-aq qazylar men kórermenderdiń erekshe nazaryn aýdarǵan. Úlken sahnadaǵy tájirıbesi az bolsa da, ártúrli mýzykalyq stılder men repertýarlardy sátti ıgerip, óziniń kásibı deńgeıin kórsetip keledi. Jartylaı fınalda Sanat Samıra Efendıdiń repertýarynan alynǵan Mata Hari ánin oryndady. Aıta keteıik, Samıra Efendı – «Evrovıdenıe-2021» baıqaýynda halyqaralyq tanymaldyqqa ıe bolǵan ázirbaıjandyq ánshi.

Shoýdyń fınaldyq kezeńi 25 mamyrda ótedi. Sanat daıyndyqty jalǵastyryp jatyr, degenmen jartylaı fınal aldyndaǵy kezeń ońaı bolmaǵan. Ol qazirgi tańda T.Júrgenov atyndaǵy Qazaq ulttyq óner akademııasynyń stýdenti. Baıqaýǵa qatysýymen qatar, sessııa tapsyrýy da onyń ýaqytyna úlken salmaq túsirgen. Repetıııalar, materıalmen jumys jáne sahnalyq obraz daıyndaý – barlyǵy qysqa merzimde qatar atqarylǵan.

Aıta ketken jón, jeńimpazdy anyqtaý tek ázirbaıjandyq baılanys operatorlarynyń sim-kartalary arqyly berilgen daýystarǵa baılanysty júzege asady. Sondyqtan Qazaqstannan daýys berý múmkin emes.

Degenmen, Sanat sońǵy bes kún ishinde halyqaralyq The Voice reıtıngterinde «Aptanyń úzdik óner kórsetýleri» qataryna endi. Onyń alty qoıylymynyń tórteýi mýzykalyq franshıza prodıýserlerinen joǵary baǵa aldy. Qazaqstan men ózge elderdegi jankúıerler Sanattyń jeńisine zor úmit artyp otyr.