Қазақмыс корпорациясы активтерінің бір бөлігін қайта ұйымдастыру жөніндегі мәміленің аяқталғанын ресми түрде жариялады, деп хабарлайды qandastar.kz порталы.
Өзгерістер қатысушылар құрамының жаңаруына байланысты жүзеге асырылды.
Компания мәліметінше, бұл қадам бизнес құрылымын оңтайландыруға, корпоративтік басқарудың ашықтығын арттыруға және негізгі қызмет бағыттарына шоғырлануға мүмкіндік береді.
Мәміле нәтижесінде Топ құрамында жұмысын жалғастыратын ұйымдардың жаңартылған құрылымы бекітілді. Оның құрамына өндірістік, барлау, металлургия, сервистік және білім беру бағытындағы бірқатар кәсіпорындар енді.
Сонымен қатар меншік құрылымындағы өзгерістерге байланысты бірқатар энергетикалық, сақтандыру және инфрақұрылымдық компаниялар Корпорация құрамынан шығарылып, өзге заңды тұлғалардың меншігіне өтті.
Корпорация аталған ұйымдардың қызметі енді өзінің жауапкершілік аймағына кірмейтінін атап өтті.
Компания өкілдерінің айтуынша, жүргізілген қайта ұйымдастыру өндірістік қызметке, қызметкерлер алдындағы әлеуметтік міндеттемелерге, сондай-ақ серіктестер мен мемлекеттік органдармен өзара іс-қимылға әсер етпейді. Барлық үдерістер қалыпты режимде жалғасуда.
Қазақмыс өнеркәсіптік қауіпсіздік, тұрақты даму және әлеуметтік жауапкершілік қағидаттарын сақтай отырып, инвестициялық бағдарламаларын іске асыруды жалғастыратынын мәлімдеді.
Қосымша ақпарат заңнама мен корпоративтік талаптарға сәйкес жарияланатын болады.
