Қазақстандықтар 21–25 наурыз аралығында қатарынан бес күн демалады. Ұлыстың ұлы күніне орай елдің барлық өңірінде мерекелік шаралар ұйымдастырылып, тұрғындар үшін концерттер, фестивальдер, жәрмеңкелер мен спорттық жарыстар өткізіледі. Кейбір азаматтар бұл демалысты пайдаланып, Наурызды басқа қалада қарсы алуды жөн көреді. Бұл туралы Qandastar.kz сайты Informburo.kz порталына сілтеме жасап хабарлады.
Осыған байланысты түрлі қалалардағы мерекелік бағдарламаларға қысқаша шолу жасайық.
Астана қаласы
Елордада Наурыз кең көлемде аталып өтеді. 21 наурызда Достық үйінде «Қош келдің, Әз Наурыз!» атты үлкен мерекелік іс-шара өтеді. 21–22 наурыз күндері қаланың негізгі орындарында концерттер ұйымдастырылады: орталық алаң, «Қазақ елі» монументі маңы, EXPO аумағы, «Астана Арена» стадионы, «Astana Music Hall» және «Ататүрік» саябағы.
Сондай-ақ осы күндері роботтар қатысатын заманауи көрсетілімдер, ұлттық ойындар, түрлі тұрғын алаптарда халықтық мерекелер өтеді. EXPO аумағында шығармашылық ұжымдардың өнері, ұлттық спорт түрлері және жәрмеңкелер ұйымдастырылады. Бұдан бөлек, цирк бағдарламасы, интерактивті киіз үй, робототехника көрмелері мен спорттық жарыстар да жоспарланған.
Алматы қаласы
Алматыда 200-ден астам іс-шара өткізіледі. Негізгі мерекелік орындар – Астана алаңы, Абай алаңы, Арбат (Жібек жолы – Панфилов көшелері). Қала аудандарында да концерттер мен мәдени бағдарламалар ұйымдастырылады.
21–23 наурыз аралығында тұрғындар концерттерді, театрландырылған қойылымдарды, көрмелерді және ұлттық дәстүрлерді тамашалай алады. Белгілі әншілер мен топтар өнер көрсетеді. Сонымен қатар кітап фестивалі, этно-көрмелер, караоке алаңдары, заманауи арт-көрмелер ұйымдастырылады. «Алатау» театрында бірнеше күн бойы цирктік шоу өтеді, ал метро бекеттерінде фотокөрмелер қойылады.
Шымкент қаласы
Шымкентте мерекелік іс-шаралар бірнеше алаңда өтеді: «Астана», «Әл-Фараби», «Наурыз» алаңдары, саябақтар мен Арбат аймағы.
21 наурызда театрландырылған қойылым, концерттер және кешкі отшашу ұйымдастырылады. Сонымен қатар робототехника көрмесі, VR ойындар, гастрономиялық фестиваль өтеді. Келесі күндері концерттер, би кештері, сән көрсетілімдері және оркестрлер айтысы жоспарланған. 24 наурызда танымал жұлдыздардың қатысуымен гала-концерт және дрон шоу өтеді.
Түркістан қаласы
Түркістанда Наурыз ерекше ұлттық нақышта атап өтіледі. Қаланың атшабарында 21–22 наурыз күндері концерттер, жәрмеңкелер және ұлттық спорт жарыстары өтеді.
Бағдарламада көкпардан әлем чемпионаты, аударыспақ, теңге ілу, садақ ату және бәйге сияқты жарыстар бар. Сонымен қатар сән көрсетілімі, айтыс, танымал әншілердің концерті және мерекелік отшашу ұйымдастырылады.
Қорыта айтқанда, еліміздің ірі қалаларында Наурыз мейрамы ауқымды түрде тойланып, әр тұрғын өзіне қызықты демалыс түрін таба алады.
