Әлем жаңалықтары
Қазақстан үкіметі АҚШ билігі енгізген баж салығына қатысты не дейді?
Фото: ашық дереккөз
Сауда министрлігі елден Америкаға экспортталатын тауарлардың елеулі бөлігіне Трамп енгізген тарифтердің әсері болмайды деп отыр. Өткен жылы Қазақстанның АҚШ-қа экспорт көлемі 30,6%-ға артып, 2 млрд доллар болған. Негізінен шикі мұнай, уран, күміс, ферроқорытпа және басқа да тауарлар тасымалданады, деп жазды qandastar.kz
«Бұл санаттағы өнімдер АҚШ Президентінің Жарлығы бойынша ерекше тізімге енген. Бұл 92% тең», — делінген ведомство хабарламасында.
Қосымша баждар белгілі бір тауар топтарына қатысты енгізіледі. Бұл санаттағы тауарлардың экспорт көлемі былтыр 95,2 млн доллар болған. Олардың ішінде фосфор, ферросилиций, линзалар, бидай клейковинасы, аммоний нитраты бар. Демек қабылданған тарифтік шаралар Қазақстанның АҚШ-қа жалпы экспортының тек 4,8%-ына ғана әсер етеді.
«Үкімет Қазақстанға қатысты қосымша баждарды қолданбау мүмкіндігін талқылау үшін АҚШ тарапымен консультациялар жүргізуге ниетті», — делінген Сауда министрлігі хабарламасында.
