Ұлттық статистика бюросы 8 наурыз – Халықаралық әйелдер күні қарсаңында Қазақстандағы әйелдердің саны мен әлеуметтік көрсеткіштеріне қатысты деректерді жариялады.
Бюро мәліметіне сәйкес, қазіргі уақытта елімізде 10 488 074 әйел тұрады.
Жас құрылымы бойынша әйелдердің 29,1 пайызы – 0–15 жас аралығындағылар, 55,5 пайызы – 16–60 жас аралығындағылар, ал 15,4 пайызы – 61 жастан асқан азаматтар.
Әйелдердің ең көп бөлігі Алматы қаласында – шамамен 1,2 миллион. Сонымен қатар Түркістан облысында – 1 миллион, Астана қаласында – 803,5 мың, ал Алматы облысында – 778,5 мың әйел тұрады.
Қазақстандағы әйелдердің орташа жасы – 34,1 жас. Ал өмір сүру ұзақтығы орта есеппен 79,4 жылды құрайды.
Еңбек нарығына қатысты деректерге сүйенсек, жұмыспен қамтылған халықтың 48 пайызы немесе шамамен 4,4 миллионы – әйелдер. Жалдамалы қызметкерлер арасында олардың үлесі 50 пайыз болса, өз бетінше жұмыспен айналысатындардың ішінде 45 пайызды құрайды.
Салалар бойынша қарастырғанда, жұмыс істейтін әйелдердің басым бөлігі білім беру саласында – 20 пайыз. Сауда саласында – 19 пайыз, ал денсаулық сақтау жүйесінде – 10 пайыз еңбек етеді.
Сонымен қатар жеке кәсіпкерлердің 50,8 пайызы – әйелдер.
Жұмыс істейтін әйелдердің ішінде ең көп үлесті 35–44 жас аралығындағы азаматтар құрайды. Бұл санаттағы әйелдердің саны шамамен 1,3 миллион адам.
