Qazaqstanda ákimderge jańa ókilettikter beriledi

Qazaqstanda «erikti» jáne «ózin-ózi qorǵaýdy qalyptastyrý» uǵymdary engizilip jatyr. Tıisti zańdy 5 mamyrda Senat depýtattary qarady, – dep habarlaıdy Tengrinews.kz tilshisi.

Zańda aýmaqtyq qorǵanystyń maqsattary, mindetteri, qaǵıdattary men sharalary anyqtalǵan, Prezıdenttiń, Úkimettiń, Qorǵanys mınıstrliginiń ókileti bekitilgen. Sondaı-aq qujatta Prezıdentke tikeleı baǵynatyn jáne esep beretin memlekettik organdardyń, ortalyq memlekettik organdar men ákimdikterdiń, menshik nysanyna qaramastan uıymdardyń quzyreti, sondaı-aq azamattardyń quqyqtary men mindetteri aıqyndalǵan.

Senattyń jalpy otyrysynda depýtat Marat Qojaevtyń aıtýynsha, aýmaqtyq qorǵanys týraly zańǵa ákimdi aýmaqtyq qorǵanystyń basshysy etip belgileıtin bap engizilmek.

«Zańǵa sáıkes, Qorǵanys mınıstrligi aýmaqtyq qorǵanys salasyndaǵy ýákiletti organ retinde aýmaqtyq qorǵanysqa daıyndyq pen ony júrgizý qaǵıdalaryn ázirleıdi, aýmaqtyq qorǵanys obektileriniń tizbesin anyqtaıdy, aýmaqtyq áskerlerdi qarý-jaraqpen qamtamasyz etedi, sondaı-aq qaralyp otyrǵan salada memlekettik baqylaý júrgizedi. Sonymen qatar, osy zańnyń 13-babynda ákim tıisti ákimshilik-aýmaqtyq birliktiń aýmaqtyq qorǵanysynyń basshysy bolyp tabylady jáne onyń uıymdastyrylýy men jaı-kúıine jaýapty ekeni belgilengen», – dedi Qojaev.

Osyǵan baılanysty ol Qorǵanys mınıstrligi ókiline mynadaı suraq qoıdy: bul baǵynystylyq pen eseptilik vertıkali qalaı qurylmaq?

«Qorǵanys mınıstrligi qandaı sheshimder qabyldaıdy, ákim qandaı sheshimder qabyldaıdy degendi aıqyndaıtyn, aýmaqtyq qorǵanysty uıymdastyrý men júrgizý máselelerinde qaıtalanýdy nemese olqylyqtardy boldyrmaý úshin qandaı da bir zańǵa táýeldi normatıvtik-quqyqtyq akt qabyldana ma?» – dep surady depýtat.

Qorǵanys mınıstriniń birinshi orynbasary Sultan Qamaletdınov zańda ákimniń aýmaqtyq qorǵanys aımaǵynyń bastyǵy bolyp belgilenetini ras ekenin aıtty.

«Osy zań qabyldanǵannan keıin birqatar zańǵa táýeldi aktiler ázirlenedi, olardyń qatarynda… Aýmaqtyq qorǵanys júıesin uıymdastyrý týraly Prezıdent Jarlyǵy ázirlenedi. Normatıvtik-quqyqtyq akt jabyq sıpatta bolady, onda ýákiletti organdardyń, Qorǵanys mınıstrliginiń jáne jergilikti atqarýshy organnyń baǵynystylyǵy men jaýapkershiligi máseleleri kózdeledi», – dep jaýap berdi Qamaletdınov.

Senat depýtattary zańdy eki oqylymda qarap, ony maquldaýǵa daýys berdi.