Қазақстанда 14 наурыздан бастап жалпыұлттық «Наурызнама» декадасы басталды. Бүгін елімізде Амал мерекесі – Көрісу күні атап өтілуде, деп хабарлайды Qandastar.kz сайты Stan.kz порталына сілтеп.
Қазақстанның батыс өңірлерінде 14 наурыз күні адамдар бір-біріне арнайы барып амандасып, қыстан аман шыққандарына қуанып, “Бір жасыңмен!” деп құттықтайды. Көрісу күні өкпе-ренішті ұмытып, адамдар арасындағы татулық пен жылылықты арттыратын ерекше мереке болып саналады. Бұл күн сонымен бірге Наурыз мейрамының басталуын білдіреді.
Мерекеге орай елімізде мәдени және мерекелік шаралар ұйымдастырылуда:
- Ұлттық орталық музейінде – «Көрісу күні – татулықтың бастауы» атты мәдени-танымдық іс-шара.
- Ұлттық музейдің Атриумында – «Амал мерекесі – ізгілік пен бірліктің белгісі» бағдарламасы.
- Құддыс Қожамияров атындағы Ұйғыр музыкалық комедия театрында – «Наурыз – театрлар мен мәдениеттердің қауышу мерекесі» жобасы.
- Астана Опера театрында – «Күймен келген Көрісу» атты концерт.
- Ә. Қастеев атындағы Мемлекеттік өнер музейінде – «Көрісу күні – Амал мерекесі» акциясы.
- Астанада – ұлттық ойындарға арналған «Tartys Fest» фестивалі, арқан тарту жарыстары жасанды интеллект технологияларын қолдана отырып өтеді.
- Алматыда, Көктөбе алаңында – қазақстандық эстрада жұлдыздарының қатысуымен мерекелік концерт.
Өңірлерде де мерекелік іс-шаралар ұйымдастырылған:
- Ақмола облысында – дәстүрлерге арналған концерттік бағдарламалар;
- Түркістан облысында – «Көрісу күні – Амал мерекесі» облыстық челленджі;
- Батыс Қазақстан облысында – «Наурыз думан» атты мерекелік концерт.
Көрісу күні – Наурызнаманың алғашқы күні ретінде дәстүрлі құндылықтар мен заманауи қоғамдық мағынаны біріктіріп, бірлік пен ізгілікке толы мерекелік күн болып саналады.
