Jańalyqtar
Qazaqstanda balasyna qol kótergen ata-analar túrmege toǵytylatyn boldy
istockphoto
Osy aıda bala tárbıesine qatysty zańǵa engizilgen ózgerister kúshine enedi, dep jazdy qandastar.kz
Budan bylaı óz mindetin durys oryndamaǵan ata-analar qylmystyq jaýapkershilikke tartylyp, úsh jylǵa deıin bas bostandyǵynan aıyrylýy múmkin. Sputnik Qazaqstan zańnyń negizgi talaptaryn usynady.
Buryn qalaı boldy?
Qylmystyq kodekstegi 140-bap aıasynda kámeletke tolmaǵan balany tárbıeleý jónindegi mindetterdi oryndamaýǵa qatysty jaza qarastyrylǵan. Sonyń ishinde balanyń ómiri men densaýlyǵyna durys qaramaý, qatygezdik tanytý, qaraýsyz qaldyrý nemese zańsyz iske májbúrleý sııaqty áreketter bar. Buǵan deıin balany urǵany úshin kóp jaǵdaıda ákimshilik jaza qoldanylatyn. Atap aıtqanda, 160 AEK-ke (2025 jylda – 630 myń teńge) deıingi aıyppul salynady nemese 40 táýlikke qamaýǵa alynady.
Máselen, byltyr Pavlodarda týǵan qyzyn urǵan ákege qatysty ákimshilik is qozǵalǵan. Biraq aıyppul da, qamaýǵa alý jazasy da qoldanylǵan joq. Ol kezde sot er adamǵa qatysty kámeletke tolmaǵannyń qaýipsizdigi maqsatynda 30 táýlik merzimge qorǵaý uıǵarymyn shyǵarǵan. Sondaı-aq ol profılaktıkalyq esepke alyndy.
Zańǵa qandaı ózgerister engizildi?
16 qyrkúıekte Qylmystyq kodekske engizilgen ózgerister kúshine enedi. Oǵan sáıkes, balasyn urǵan ata-analar nemese zańdy ókilderine iri kólemde aıyppul salynady, ıa bolmasa, túrmege toǵytylýy múmkin.
Negizgi ózgerister:
aıyppuldyń kólemi – 1 000 AEK (2025 jyly 3 932 000 teńge);
600 saǵatqa deıingi qoǵamdyq jumysqa tartý;
qatygezdik tanytqany úshin 2 jylǵa deıin bas bostandyǵynan aıyrý;
birneshe balaǵa qatysty jasalǵan áreket úshin 3 jylǵa deıin bas bostandyǵynan aıyrý.
Resmı málimetke sáıkes, byltyr Qazaqstanda 600-den astam adam ata-ana quqyǵynan aıyrylǵan. Balany tárbıeleý jónindegi mindetterin oryndamaǵan 6 myń ata-ana profılaktıkalyq esepke qoıyldy.
Aıta keteri, 140-bapta balanyń ata-anasynan bólek pedagogtiń nemese oqý, tárbıeleý, emdeý mekemesiniń nemese kámeletke tolmaǵan adamdy qadaǵalaýǵa mindetti basqa da mekeme jumyskeriniń jaýapkershiligi de kórsetilgen. Demek balany urǵan tárbıeshiler de týra sondaı jazaǵa tartylady.
