Қазақстандық Бауыржан Жақыпов әлеуметтік желілерде әкесімен бірге қиын жағдайға тап болған екі аққуды қалай құтқарғаны туралы оқиғамен бөлісті. Құстар ұша алмай, мұз басқан су айдынында жатқан, деп жазады qandastar.kz.
Мұз қатып қалған көлдің жанынан өтіп бара жатып, ер адамдар жалғыз аққуды байқайды. Бауыржанның айтуынша, ұрғашы аққу мұзға қатып қалған, ал еркек аққу бұған дейін жылы жаққа ұшып кеткен. Аяз бен жаңбырдың салдарынан құстар қатты әлсіреген.
«Ұрғашы аққу мұзға қатып қалыпты, ал еркегі жылы жаққа ұшып кеткен. Біз оларды суықтан құтқардық, бірақ енді оларды қалай дұрыс күту керектігін және ары қарай не болатынын білмейміз», – деп жазды ол Instagram парақшасында.
Әкесімен бірге олар алғашқы аққуды абайлап ұстап алды – құс тіпті қарсылық көрсетпеген. Ер адам оны қолына алған сәтте, аққу қанаттарын қысып, құтқарылып жатқанын сезгендей бауырына тығыла түсті.
Алайда оқиға мұнымен аяқталған жоқ. Көлікке бет алып бара жатқанда, олар алыстан тағы бір ақ дақты байқайды. Бұл екінші аққу болып шықты – оның қауырсындары мұзға жабысып қалған. Бауыржан құсқа зиян келтірмей босату үшін мұзды қолымен абайлап жылыта бастаған.
Екі аққуды да көлікке отырғызып, үйіне алып кеткен. Қазір ер адам оларды емдеп, толық қалпына келтіруді жоспарлап отыр.
Пікірлерде қолданушылар Бауыржанның бұл ісіне таңданыс білдіріп, ақ тілектерін жаудырды және орнитологтарды кеңес беруге шақырды:
«Жарайсыздар!»
«Алла сақтасын»
«Нағыз ер азаматқа лайық өте игі іс»
«Мамандар, аққуларды қалай дұрыс күту керек екенін айтыңыздаршы: оларға қандай жем қажет және қандай жағдайда ұстаған дұрыс?» – деп жазды пікір қалдырушылар.
