2026 жылғы 1 наурызда Қазақстанның 13 қаласында ауа сапасының нашарлауы мүмкін деген болжам жасалды, деп хабарлайды Qandastar.kz сайты Zakon.kz порталына сілтеп.
«Қазгидромет» мәліметіне сәйкес, қолайсыз метеорологиялық жағдай Көкшетау, Павлодар, Қарағанды, Жезқазған, Балқаш, Теміртау, Өскемен, Семей, Риддер, Атырау, Ақтөбе қалаларында, сондай-ақ түнгі уақытта Астана мен Петропавлда тіркелуі ықтимал.
Қолайсыз метеорологиялық жағдай — желдің болмауы немесе әлсіз соғуы, тұман мен ауа инверсиясы сияқты қысқа мерзімді ауа райы құбылыстарының жиынтығы. Мұндай кезде атмосфераның жерге жақын қабатында зиянды заттар жиналып, ауаның ластану деңгейі артады.
Осы кезеңде тұрғындарға ашық ауада ұзақ жүрмеу, әсіресе автожолдар мен ластаушы көздерге жақын аймақтардан аулақ болу ұсынылады. Созылмалы өкпе, жүрек-қан тамырлары аурулары бар және аллергияға бейім азаматтарға сыртқа шыққанда қажетті дәрі-дәрмектерін өзімен бірге алып жүргені жөн.
