قازاقستاننىڭ بىرنەشە وڭىرىندە ازاماتتاردى جۇمىسقا ورنالاستىرۋ بويىنشا جاڭا جوبا ىسكە قوسىلدى

فوتو: ايكىن.كز

استانا قالاسىندا جۇزەگە اسىپ جاتقان «Jol Tap» جوباسى ىسپەتتى جۇمىسپەن قامتۋ جوباسى ەلىمىزدىڭ بىرنەشە وڭىرىندە قولعا الىندى, – دەپ حابارلايدى Aikyn.kz ۇكىمەتتىڭ ءباسپاسوز قىزمەتىنە سىلتەمە جاساپ. 

ونىڭ اياسىندا مەملەكەتتىك قولداۋ شارالارى بويىنشا كونسۋلتاتسيالار جۇرگىزىلەدى, سونداي-اق تەگىن قىسقا مەرزىمدى وقىتۋ كۋرستارى ۇسىنىلادى جانە جۇمىسسىزدار نەمەسە ۋاقىتشا جۇمىسپەن قامتىلعان ازاماتتار جۇمىسقا ورنالاستىرىلادى. جوبانىڭ نەگىزگى ەرەكشەلىگى – ماماندار ازاماتتاردىڭ كەلۋىن كۇتپەي, كەرىسىنشە, ساۋدا ورتالىقتارى سەكىلدى ادام كوپ جۇرەتىن جەرلەرگە شىعىپ, كەڭەس بەرەدى. بۇل باعىتتا وڭىرلەردە اتقارىلىپ جاتقان شارالار قر پرەمەر-ءمينيسترىنىڭ ورىنباسارى تامارا دۇيسەنوۆانىڭ توراعالىعىمەن وتكەن كەڭەستە تالقىلاندى.

قاراعاندى وبلىسىندا جوبا 25 ماۋسىمنان باستاپ جۇزەگە اسۋدا. 4 كەڭەس بەرۋ پۋنكتى اشىلدى. 3-ەۋى وبلىس ورتالىعىندا, 1-ءى تەمىرتاۋ قالاسىندا ورنالاسقان. مۇندا ارنايى وقىتىلعان 8 مامان قىزمەت كورسەتەدى.

«جوبا شەڭبەرىندە 15 ماۋسىمدا كوميۋنيتي-ورتالىق اشىلدى. مۇندا جاستار ءۇشىن دىبىس جانە پوداكست جازۋ ستۋديالارى جۇمىس ىستەيتىن بولادى. ياعني, ولارعا كرەاتيۆتى ءونىم شىعارۋعا قاتىستى ترەنينگتەر ۇيىمداستىرىلىپ, داعدىلاردى يگەرۋگە مۇمكىندىك بەرىلەدى. ءبىز, سونداي-اق, كومەككە جۇگىنگەن ازاماتتارعا 5 كوللەدج بازاسىندا قىسقا مەرزىمدى وقۋ كۋرستارىن ۇسىنىپ وتىرمىز. 1 تامىزدان باستاپ, مەڭگەرەتىن ماماندىقتاردىڭ كۇردەلىلىگىنە قاراي ۇزاقتىعى 5-30 كۇن ارالىعىنداعى كۋرستار ۇيىمداستىرىلادى. سوڭىندا سەرتيفيكات تابىستالىپ, جۇمىسقا ورنالاستىرىلادى», – دەدى وبلىس اكىمىنىڭ ورىنباسارى ەرمەك الپىسوۆ.

سونىمەن قاتار وڭىردە 60-50-50 ءنومىرلى بايلانىس ورتالىعى دا جۇمىس ىستەۋدە. قولدانۋشىلار ىڭعايلىلىعى ءۇشىن تەلەگرام-ارنا ىسكە قوسىلدى.

الماتى جوباسى اياسىندا قۇرىلعان Telegram-بوت وزىندىك اقپاراتتىق جۇيە ىسپەتتى. مۇندا جازعان ازاماتقا بىردەن بوس جۇمىس ورىندارى مەن تەگىن ونلاين-كۋرستار تىزبەسى ۇسىنىلادى. ول ءۇشىن بوت «jasalmaty.kz» جاستار پورتالىمەن ينتەگراتسيالانعان. قىزمەتتەر ازاماتتارعا پرواكتيۆتى رەجيمدە ۇسىنىلادى.

«ءبىز استانادا جۇزەگە اسىپ جاتقان “Jol Tap” نەگىزىندە جۇمىس ىستەۋدى ۇيعاردىق. الايدا, الماتى ەرەكشەلىكتەرىن ەسكەرە وتىرىپ, بىرقاتار تالاپتى وزگەرتتىك. قالاداعى 8 كوميۋنيتي-ورتالىقتا كەڭەس بەرۋ نۇكتەلەرى اشىلدى. وعان قوسىمشا ءىرى ساۋدا ورتالىقتارى ىشىنەن 3 پۋنكت ۇيىمداستىرىلدى. جوبانى تولىعىمەن 1 شىلدەدەن باستاپ جۇزەگە اسىرۋعا دايىنبىز», – دەدى قالالىق جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى باۋىرجان جاۋباسوۆ.

شىمكەنتتە جوبا 25 مامىردان باستاپ جۇزەگە اسىرىلىپ جاتىر. وسى ۋاقىت ارالىعىندا 10 كەڭەس بەرۋ پۋنكتىندە 183 ازامات ءتۇسىندىرۋ جۇمىستارىمەن قامتىلدى. قالا اكىمىنىڭ ورىنباسارى سارسەن قۇرانبەكتىڭ سوزىنشە, ولاردىڭ ءبىرازى الەۋمەتتىك كومەك الۋشىلار تىزىمىنە تىركەلسە, ەندى ءبىرى تۇرعىن ءۇي كەزەگىنە قويىلدى. بىرقاتار ازامات كاسىپتىك وقىتۋ شارالارىمەن قامتىلدى.

اقتوبە وبلىسىندا جوبا ارقىلى جۇمىسقا ورنالاستىرۋدىڭ 2 نۇسقاسى جۇزەگە اسىرىلماق. وبلىستىڭ جاستار ساياساتى باسقارماسىنىڭ باسشىسى ميرحان ەرماعانبەتوۆتىڭ سوزىنشە, بۇگىندە وڭىردەگى شاعىن جانە ورتا بيزنەس وكىلدەرىمەن كەلىسسوزدەر جۇرگىزىلگەن. ناتيجەسىندە 40 كاسىپكەر جوباعا قاتىسۋشىلار ءۇشىن شەبەرلىك ساعاتتارىن وتكىزىپ, كەيىن ولاردى جۇمىسقا ورنالاستىرۋعا كەلىسكەن.

«سونداي-اق ءبىز يندۋستريالدى دامۋ باسقارماسى ارقىلى ونەركاسىپ ورىندارىنداعى ۆاكانسيالاردى ۇسىنباقپىز. قازىرگى تاڭدا الدىن الا كەلىسىم بار. بۇل رەتتە ەڭبەك موبيلدىلىگى ورتالىعىنىڭ مۇمكىندىكتەرىن پايدالانۋ كوزدەلىپ وتىر», – دەدى ميرحان ەرماعانبەتوۆ.

وڭىردە جوبا 15 شىلدەدەن باستاپ جۇزەگە اسىرىلماق. ونىڭ شەڭبەرىندە وبلىس ورتالىعىنىڭ حالىق كوپ شوعىرلانعان اۋماقتارىندا 5 ءمودۋلدى پۋنكت ورناتۋ قاراستىرىلعان.

«جوبا ءار ءوڭىردىڭ ءوز ەرەكشەلىكتەرىنە قاراي جۇزەگە اسىرىلىپ كەلەدى. دەگەنمەن, وڭ تاجىريبەلەرمەن ءوزارا الماسۋ قاجەت دەپ ويلايمىن. ەڭ نەگىزگى ماقسات – ازاماتتاردى جۇمىسپەن قامتۋ. بۇل رەتتە بارلىق مۇمكىندىكتەردى پايدالانۋىمىز كەرەك», – دەپ اتاپ ءوتتى تامارا دۇيسەنوۆا.