Алты қалада ауа сапасы нашарлайды: Тұрғындарға сақтық шараларын сақтау ұсынылды. Бұл туралы Qandastar.kz сайты хабарлады.
Бүгін Қазақстанның алты қаласында қолайсыз метеорологиялық жағдай (ҚМЖ) күтіледі. Осыған байланысты мамандар тұрғындарға ашық ауада ұзақ уақыт жүрмеуге және денсаулығына ерекше көңіл бөлуге кеңес береді.
«Қазгидромет» РМК мәліметінше, 3 қыркүйекте Орал, Ақтөбе, Астана және Алматы қалаларында, ал түнгі уақытта Атырау мен Өскеменде қолайсыз метеорологиялық жағдай қалыптасады.
Қолайсыз метеорологиялық жағдай – атмосфераның жерге жақын қабатында зиянды заттардың жиналуына ықпал ететін қысқа мерзімді ауа райы құбылыстарының жиынтығы. Оған желдің баяу соғуы немесе мүлде болмауы, тұман және температуралық инверсия жатады. Мұндай кезде ауадағы ластаушы заттардың таралуы қиындап, олардың концентрациясы артады.
Осыған байланысты тұрғындарға, әсіресе көлік қозғалысы көп көшелер мен өндірістік аймақтардың маңында ұзақ уақыт болмауға кеңес беріледі. Ал тыныс алу жүйесі, жүрек-қан тамырлары аурулары немесе аллергиясы бар азаматтарға сыртқа шығарда қажетті дәрі-дәрмектерін өзімен бірге алып жүру ұсынылады.
Айта кетейік, бұған дейін де синоптиктер Орал, Ақтөбе, Атырау және Астана қалаларында қолайсыз метеорологиялық жағдай күтілетіні туралы ескерту жасаған болатын.
