«Keletin sýdyń mólsheri kóbeıedi eken dep úmittenýdiń qajeti joq» — sarapshy Kaspıı týrasynda

Foto: Dalanews

Sarapshylar Kaspıı teńizine qatysty dabyl qaǵyp otyr, dep habarlaıdy qandastar.kz Dalanews.kz-ke silteme jasap.

24.kz málimetine súıensek, bes memleketke ortaq teńizdiń qazaqstandyq bóliginde jaǵalaý syzyǵy 18 shaqyrymǵa sheginip ketken. Aqtaýda bas qosqan tabıǵat janashylarlary bul qubylysty ekologııalyq apatqa teńep otyr. Jıynǵa táýelsiz sarapshylar, jergilikti ýákiletti organdarmen qatar, halyqaralyq uıym músheleri de qatysty.

«Kaspııdiń jyldam taıyzdanýyna oǵan quıatyn 130 ózenniń kóbiniń tartylyp qalýy, ásirese, Edildiń boıynda 12 sý elektr stanııasy salynýy tikeleı áser etti. Másele ǵalamdyq deńgeıge kóterilmeýin Kaspıı mańy elderi birlese áreket etý arqyly ǵana toqtata alady», — deıdi forýmǵa qatysýshylar.

Keıingi jyldary júrgizilgen zertteýler teńiz sýynyń jalpy aýmaǵy 70 myń sharshy shaqyrymǵa deıin sheginip ketkenin kórsetken.

«Kaspıı Araldyń taǵdyryn bastan keshýi múmkin. Keletin sýdyń mólsheri kóbeıedi eken dep úmittenýdiń qajeti joq. Olaı bolsa, basqa jobany qarastyrý qajet. Sonaý soltústiktegi Ob ózeniniń bir bóligin Torǵaı qaqpasy arqyly Kaspıı teńizine ákelip quıý. Ekinshi nusqa — Eýrazııa kanalyn salý. Bul kanal arqyly Qara teńizben, dálirek aıtqanda, Azov teńizi men Kaspıı teńiziniń arasyn Qýma-Manash oıpattary arqyly qosý», — deıdi Amanat partııasy janyndaǵy ekologııalyq keńestiń tóraǵasy Orynbasar Toǵjanov.