كينو كورۋگە بارعان بۇلدىرشىندەرگە جىنىستىق قاتىناسى بار فيلمدەر جارنامالانعان

فوتو: istockphoto.com

تۇركىستاندا كينو كورۋگە بارعان بۇلدىرشىندەرگە جىنىستىق قاتىناسى بار فيلمدەردىڭ جارناماسى كورسەتىلگەن. بۇل تۋرالى جەلى قولدانۋشى مولديار ەرگەبەكوۆ Facebook پاراقشاسىندا جازدى, دەپ حابارلايدى Azattyq Rýhy.

ول تۇركىستانداعى حاديشا پلازا كينوپاركتىڭ ارەكەتىن قاتاڭ سىنعا الدى.

«8 جاسار قىزىممەن بىرگە مۋلتفيلم كورۋ ءۇشىن كينوپارك كينوتەاتر جەلىسىنىڭ تۇركىستانداعى فيليالىنا باردىق (حاديشا پلازا كينوپارك). ءاربىر فيلم كورسەتىلمەستەن بۇرىن جاقىندا كورسەتىلىمگە كىرەتىن فيلمدەردىڭ جارناما روليكتەرى جۇرەدى, 10 مينۋتتاي. بالالارعا ارنالعان سەانستا ەرەسەكتەرگە ارنالعان فيلمدەردىڭ جارناماسى ءجۇردى. ال فيلم جارنامالارى ءاردايىم ءفيلمنىڭ ەڭ درامالىق, ەڭ تراگەديالىق نەمەسە ەڭ كۇلكىلى ساحنالارىن قولدانادى. 10 مينۋتتىڭ ىشىندە كىشكەنتاي عانا قىزىم اربالەنى كوردى: جىنىستىق قاتىناسى بار ساحنالار, اسىلىپ ولەيىن دەپ جاتقان ادام, ءۇي ىشىندەگى اسا قاتىگەز زورلىق-زومبىلىق جانە تاعى باسقا… بۇل وتە سۇمدىق جاعداي. بالالارعا ارنالعان سەانستا تەك بالالارعا ارنالعان كونتەنتتىڭ جارناماسى ءجۇرۋى كەرەك», – دەپ جازدى م. ەرگەبەكوۆ.

ول ءوز سوزىندە كينوپارك جانە تاعى باسقا كينوتەاتر جەلىلەرى بۇنى بىلمەسە مادەنيەت جانە اقپارات مينيسترلىگى ولارعا ايتىپ مىندەتتەۋى كەرەك ەكەنىن اتاپ ءوتتى.

«قىزىمدى اڭگىمەگە اينالدىرىپ قورقىنىشتى ساحنالاردى كورۋدەن اۋلاق ۇستاۋعا تىرىستىم, الايدا كينوتەاتردا بۇنى جاساۋ مۇمكىن ەمەس. ەلىمىزدە سۋيتسيد جاساۋ جاسى ءبۇلدىرشىن جاستاعىلارعا دەيىن تومەندەگەن مىنا زاماندا, مۇنداي قورقىنىشتى وقيعالاردىڭ سەبەپتەرىنىڭ ءبىرىن وسىناۋ 10 مينۋتتىق جارناما روليكتەرىنەن دە ىزدەۋگە بولادى دەپ ويلايمىن. قادىرمەن وقىرماندارىم, بۇل سۇمدىقتى ءبارىمىز بىرىگىپ توقتاتايىق. بۇل جاعدايعا ءۇن قوسىڭىزدار! بالالاردىڭ پسيحيكالىق جانە فيزيولوگيالىق دەنىنىڭ ساۋ بولۋى ءبىز ەرەسەكتەرگە بايلانىستى ەكەنىن ۇمىتپايىق», – دەپ جازدى ول.