Көкшетауда ер адам алимент берешегін өтеу үшін бүйрегін сатпақ болған, деп хабарлайды qandastar.kz порталы.
Сот материалына сәйкес, 2026 жылдың қаңтарында Алматы облысының 34 жастағы тұрғыны әлеуметтік желіде өзінің бүйрегін сату туралы хабарландыру жариялаған.
Хабарландыру жарияланғаннан кейін оған Көкшетау қаласының тұрғынынан ұсыныс түскен, ол заңсыз мәмілені әшкерелеу мақсатында полицияға ерікті түрде жәрдемдесті.
2026 жылдың ақпанында ер адам медициналық тексеруден өту және мәміле жасау үшін Көкшетау қаласына келген, алайда жалған сатып алушыдан ақшаның бір бөлігін алу кезінде полиция қызметкерлерімен ұсталынды.
Сотта ол өз кінәсін мойындап, бүйрегін сату туралы хабарландыруды материалдық қиындықтарға және алимент бойынша берешегінің болуына байланысты жариялағанын түсіндірді.
Сот үкімімен оған 2 жыл шартты түрде бас бостандығынан айыру жазасы тағайындалып, пробациялық бақылау белгіленді.
