«Qoqys shyǵarý, neke kýáligi men qomaqty aqsha»: Almatyda sýdıa 75 mıllıon teńge para alǵan shendige jeńil jaza taǵaıyndaǵan

Foto: Stan.kz/ChatGPT arqyly jasaldy

Almatyda sýdıa 75 mıllıon teńge para alǵan basshyǵa jeńil jaza taǵaıyndaǵan. Al qyzmet babyn asyra paıdalandy delingen ızolıator bastyǵyn 6 jylǵa, 35 myń teńge para alǵan ájeni 3 jylǵa sottap jibergen. Bul týraly Stan.kzaqparat agenttigi habarlaıdy.

Bári neden bastaldy?

Almatynyń Túrksib aýdandyq sotynda Qylmystyq-atqarý júıesi departamenti tergeý ızolıatory bastyǵynyń eks-orynbasary Rınat Ahmetjanovtyń qylmystyq isi qaraldy.

Jýrnalıst Mıhaıl Kozachkovtyń málimetinshe, 45 jastaǵy Rınat Ahmetjanov 2024 jyldyń 1 maýsymynan bastap Qylmystyq-atqarý júıesi departamenti №72 mekemesinde basshynyń mindetin atqarýshy qyzmetinde bolǵan. Al 16-18 mamyr aralyǵynda mekemeniń rejım jáne qaýipsizdik boıynsha orynbasary bolyp, tártip pen qaýipsizdikke jaýapty bolǵan.

№72 mekeme tergeý ızolıatory sanalady. Onda kúdiktilerge tergeý júrgizilip, qamaýǵa alynady. Bir kúni bul mekeme aınalasynan jaǵymsyz ıis shyǵady. Ol nysan aınalasyna jınalǵan qoqystan shyqqan.

“О́tken jyly mekemeden qoqys ıisi shyǵa bastaǵan. Mekeme jeke kompanııamen qoqys shyǵarý boıynsha kelisim-shart jasasqan. Alaıda seriktestik óz mindettemelerin oryndaýdan bas tartqan. Sonyń saldarynan bir aı boıy jınalyp qalǵan qoqys jańbyrmen aralasyp, odan keıin kúnge kúıip jata bergen. Ýaqyt óte kele ony jeke adamdarǵa shyǵarýǵa týra kelgen. Sosyn aýmaqqa júk kótergish pen eki KamAZ jiberilgen. Al bul mindetti jazasyn ótep jatqan sottalýshy uıymdastyrǵan”, – delingen jýrnalıst jazbasynda.

Málimetke sáıkes, úkim shyǵarylǵannan keıin tergeý ızolıatorynda qalatyn sottalǵandar sanaty bar. Ádette munda kishigirim qylmys úshin bir-eki jyl alǵandar qalady. Izolıatorda olar aýyr jumys isteıdi. Olardy “sharýashylyq qaraqshysy” dep ataıdy.

“Qoqys shyǵarý mindetin moınyna alǵan “densaýlyqqa qasaqana aýyr zııan keltirgeni úshin” sottalǵan “sharýashylyq qaraqshysy” Azamat Qudaıqulov. Ol syrttan tanys Kamaz júrgizýshilerin tapqan. Al qoqysty shyǵarý shyǵynyn sottalýshyǵa anasy men áıeli jibergen”, –delingen málimette.

Tergeýshilerdiń aıtýynsha, Ahmetjanov Qudaıqulovty qoqys shyǵarýdy óz moınyna alýǵa májbúrlegen. Qudaıqulovtyń ózi muny rastap, basshy qoqys shyǵarmasań, túrli máselelerge tap bolasyń dep aıtqanyn jetkizdi. Degenmen Ahmetjanov mundaı buıryq bermegenin, qoqys shyǵarý óz mindetine kirmeıtinin jetkizdi.

“Aıyptalýshy Rınat Ahmetjanov Qylmystyq kodekstiń 362-babynyń 4-bóligi (Bılikti nemese laýazymdyq ókilettikterdi asyra paıdalaný) boıynsha kináli dep tanyldy. Ol alty jylǵa jalpy rejımdegi kolonııaǵa sottaldy. Sonymen qatar Ahmetjanov ádilet podpolkovnıgi ataǵynan aıyrylydy. Endi ol ómir boıyna memlekettik qyzmette jáne kvazımemlekettik sektorda laýazym ıelene almaıdy. Ahmetjanovtan jábirlenýshilerge 20 AEK ótemaqy jáne is júrgizý shyǵyndaryn jabý úshin 117 374 teńge óndirip alyndy”, – delingen habarlamada.

Baptyń sankııasynda 5 jyldan 10 jylǵa deıin jaza qarastyrylǵan, sondyqtan 6 jyl ortasha merzim sanalady

Endi jasalǵan qylmystar men olarǵa berilgen jazany salystyryp kórsek

Máselen «Almaty sý» memlekettik kásipornynyń top-menedjeri 37 jastaǵy Maqsat Joldybaev 75 mıllıon teńge para alǵan. Odan bólek 345 mıllıon teńge aldyn ala tólem bolǵan. Ol «qalanyń káriz jáne sýmen jabdyqtaý júıelerin kúrdeli jóndeýge memlekettik satyp alý sharttary boıynsha jumystardyń aıaqtalǵany týraly jáne bıýdjet qarajatynyń aýdarylǵany týraly aktilerge kedergisiz qol qoıamyn» degen jeleýmen kásipkerden 75 mıllıon teńge para almaq bolǵan.

Foto: Antıkor

Onyń isi bıyl 9 qańtarda Almaty qalasy Bostandyq aýdandyq sotynda qaraldy. Nátıjesinde onyń áreketi alaıaqtyq retinde saralanyp, ol 5 jylǵa shartty túrde bas bostandyǵynan aıyryldy. Alaıda úkim týraly shý shyqqannan keıin Almaty qalalyq soty shartty jazany naqty jazaǵa aýystyrdy.

«Baspasóz betterinde Joldybaev 5 jyl shartty jazaǵa kesildi degen aqparat tarady. Alaıda ol kásipkerlerden 75 mln teńge para almaq boldy degen kúdikke ilingen. Osyǵan oraı prokýratýra shaǵymy boıynsha appelıaııalyq sheshim shyǵyp, úkim 5 jylǵa bas bostandyǵynan aıyrý jazasyna aýystyrylyp, ol sot zalynda qamaýǵa alyndy», – delingen habarlamada.

Degenmen bul para almaǵan Rınat Ahmetjanovqa berilgen 6 jyldan áldeqaıda az.

Jýrnalıst Mıhaıl Kozachkovtyń málimetinshe, Ahmetjanovqa úkim shyǵarǵan Túrksib aýdandyq sotynyń sýdıasy Ǵanı Amantaıuly 35 myń teńge para alǵan 59 jastaǵy áıeldi 3 jylǵa bas bostandyǵynan aıyrǵan. 

Sybaılas jemqorlyqqa qarsy is-qımyl agenttiginiń málimetinshe, Jámıla Syraılova AHAJ bóliminde jumys istep, neke kýáligin berýmen aınalysqan. Oǵan sheteldik azamatqa turmysqa shyǵyp jatqan áıel kelip, qujatty tez jasap berýdi suraǵan. Syraılova  qujatty 15 jumys kúninen keıin ǵana bere alatynyn aıtqan. Alaıda 35 myń teńge tólese jumysty jedeldetýge bolatynyn jetkizgen. Qalyńdyq muny Sybaılas jemqorlyqqa qarsy is-qımyl agenttigine habarlap, olarmen birlese áreket etken. Ol 35 myń teńgeni Syraılovanyń esepshotyna aýdarǵan. Osylaısha Syraılovanyń áreketi memlekettik fýnkııalardy oryndaýǵa ýákilettik berilgen tulǵa jasaǵan alaıaqtyq dep saralandy.

Sýdıa Amantaıuly ony 3 jylǵa sottady. Úkim zańdy kúshine engen joq. 59 jastaǵy Syraılova 35 myń teńgeni qalyńdyqqa aýdaryp, óz kinásin moıyndaǵan. Dese de sýdıa muny eskermegen. Muny 75 mıllıon teńge para alyp, 5 jylǵa bas bostandyǵynan aıyrylǵan Maqsat Joldybaevtyń isimen salystyrsaq…

Atalǵan jaǵdaıǵa qatysty Stan.kz tilshisi Almaty qalalyq sotynan pikir surap bildi.

Sot málimetinshe, bul is Túrksib aýdandyq sotynda qaralǵan.

“Bas bostandyǵynan aıyrý týraly jaza taǵaıyndalǵan. Taraptardan apellıaııalyq  shaǵym túsirilgen. Ol apellıaııalyq satyda qaralyp, bas bostandyǵynan aıyrý jazasy aıyppulǵa ózgertilgen”, – delingen habarlamada.