Қостанай облысындағы мектептердің бірінде күрделі жөндеу жұмыстары аяқталмағандықтан, оқушылар жаңа оқу жылын уақытша басқа ғимараттарда бастайды. Мектеп оқушылары аудан әкімдігі мен Усаков орман шаруашылығының әкімшілік ғимараттарында білім алады, дейді Qandastar.kz сайты Информбюро порталына сілтеп.
Облыстық білім басқармасының мәліметінше, күрделі жөндеу екі жылға жоспарланған және жұмыстар бекітілген кестеге сәйкес жүргізіліп жатыр. Қазіргі уақытта ғимаратта ішкі әрлеу жұмыстары атқарылып, еден төселіп, есіктер орнатылуда. Жөндеуді екінші тоқсанның басына дейін аяқтау көзделген.
Уақытша оқу процесіне 110 оқушы қатысады. Сабақтар екі ауысымда ұйымдастырылып, барлық кабинеттер қажетті жиһаздармен және оқу құралдарымен жабдықталған.
Білім басқармасы бұл шешім оқушылардың оқу сапасына әсер етпейтінін және барлық жағдай жасалғанын мәлімдеді.
