Қосылған құн салығын кімдер төлемейді?

Фото: ашық дереккөз

Мәжіліс депутаты Асхат Аймағамбетов жаңа Салық кодексінің жобасында әлеуметтік сала бойынша қандай түзетулер енгізілетінін айтты, деп хабарлайды qandastar.kz

Депутаттар Салық кодексінің жобасын қарау барысында білім, ғылым, мәдениет, спорт және денсаулық сақтау салаларын қолдау және осы бағыттарда қымбаттауды болдырмау мақсатында бірқатар түзетулер әзірледі.

Асхат Аймағамбетов ұсынылған негізгі өзгерістерге тоқталды.

«Мәдениет, тарихи-мәдени мұра және арнайы әлеуметтік қызметтер саласындағы ұйымдарды КТС-тен толық босату. Отандық кітап басылымдары мен анимация индустриясын ҚҚС-тан босату, білім, ғылым, спорт және денсаулық сақтау ұйымдары үшін корпоративтік табыс салығын 5%-ға дейін төмендету. Сонымен қатар қатерлі ісік, орфандық, психикалық, жүрек-қан тамырлары, бүйрек, аутоиммунды, диабет және басқа да күрделі ауруларды емдеуге бағытталған медициналық қызметтерді ҚҚС-тен босату; ал қалған бағыттар бойынша да ҚҚС-ті қазіргі деңгейдегідей 0% күйінде сақтау немесе компромисс ретінде 5%-ға дейін азайту. Аталған ауруларды емдеуге арналған дәрілік заттарды ҚҚС-тен босату, ал басқа бағыттар бойынша да 0%, болмаса компромисс ретінде 5%-ға дейін азайту. Әдеби, көркем және ғылыми шығармалар үшін авторлық алымдарға салық жеңілдіктерін беру», — деді ол.

Оның айтуынша, қаржылық қызметтерге (банктік аударымдар, зейнетақы қорларының қызметі, төлем карталары бойынша операциялар) қосылған құн салығының салынбауы, яғни бұл саланың қымбаттауына жол бермеу мәселесі де қамтылған.

 «Букмекерлік кеңселерге, казиноларға салықты айтарлықтай көбейту, құрамында трансмайлар мен энергетикалық сусындар бар өнімдерге акциз, көптеген монополияларға арналған салықтық жеңілдіктерді жою және саяжайларға салынатын салық мөлшерін төмендету де бар», — деді мәжілісмен.

Депутат бұл түзетулер әлі жұмыс тобының отырыстарында талқыланып жатқанын, нақты шешім қабылданбағанын баса айтты.