Куба билігі елдің қарулы күштері АҚШ тарапынан болуы мүмкін қауіпке дайын екенін мәлімдеді. Бұл туралы Куба сыртқы істер министрінің орынбасары Карлос Фернандес де Коссио айтып, қазіргі әлемдік жағдайды ескере отырып, мұндай дайындықтың қажет екенін жеткізді, — деп хабарлайды Qandastar.kz тілшісі NBC News-ке сілтеме жасап.
Оның сөзінше, Кубаның әскери күштері әрдайым әзір күйде және ықтимал шабуылдарға қарсы дайындық жүргізіп жатыр. Соған қарамастан, Гавана АҚШ-пен туындаған мәселелерді бейбіт жолмен шешуге үміттенетінін атап өтті.
Сонымен қатар, де Коссио АҚШ-тың Кубаға қатысты мұнай блокадасын агрессияның бір көрінісі деп бағалап, бұл шектеулердің ұзаққа созылмайтынына сенім білдірді. Оның айтуынша, қазіргі жағдай күрделі болғанымен, ел билігі отын тапшылығын еңсеру үшін түрлі жолдарды қарастырып жатыр.
Бұған дейін Дональд Трамп Ирандағы әскери операциядан кейін Кубада да үлкен өзгерістер болуы мүмкін екенін мәлімдеген. Ал Куба президенті Мигель Диас-Канель АҚШ-пен келіссөздер өткенін растағанымен, Вашингтон тарапынан қысым жалғасып жатқанын айтқан.
Сонымен бірге, The Wall Street Journal басылымы АҚШ әкімшілігі Кубада билікті өзгертуі мүмкін деген ақпарат таратқан. Алайда АҚШ мемлекеттік хатшысы Марко Рубио бұл мәліметті жоққа шығарды.
