«Quny 2,4 mln teńge»: «Qazaqstan halqyna» qorynyń basshysy qymbat kostıýmmen kózge tústi

«Qazaqstan halqyna» qorynyń basqarma tóraıymy Lázzat Shyńǵysbaeva Qyzylordadaǵy is-sharaǵa barǵan kezde kıgen qymbat kıimi qoǵamda úlken pikirtalas týdyrdy. Áleýmettik jeli qoldanýshylary onyń Miu Miu markaly pıdjagy shamamen 2,4 mıllıon teńge, al Fendi brendiniń shalbary 1 mıllıon teńge turatynyn anyqtap, narazy boldy, dep habarlaıdy qandastar.kz

Bul jaǵdaı ásirese sırek aýrýǵa shaldyqqan balalardyń ata-analary arasynda qyzý talqylandy. Olardyń aıtýynsha, qor 2022 jyldan beri tirkelmegen qymbat dárilerdi satyp alýǵa kómektesip kelgen. Alaıda bıyl mamyr aıynda qarjy tapshylyǵyna baılanysty bul qoldaý toqtatylyp, qarajat basqa jobalarǵa baǵyttalǵany habarlanǵan.

Skifnews.kz jazǵandaı,     Dıýshenn bulshyqet dıstrofııasymen aýyratyn balalardyń ata-analary birneshe ret qor basshylyǵymen kezdesýge tyrysqan. Arnaıy Astanaǵa barǵan kúnderi olardy eshkim qabyldamaǵan. Keıin Shyńǵysbaevanyń Qyzylordadaǵy sharada qymbat brend kıimmen júrgen sýretin kórip, ashý-yzaǵa býlyqqan.

«Syrtqy kórinisiniń ózi osyndaı bolsa, jalaqysy qandaı eken degen suraq týady. Balalardyń emine aqsha jetpeı jatqanda, qymbat kıim kııý qanshalyqty oryndy?» – deıdi «О́mirge sen» qorynyń jetekshisi Sabılıa Shúgelova.

Alaıda «Qazaqstan halqyna» qorynyń ókili bul synǵa jaýap berip, Shyńǵysbaevanyń kıimi túpnusqa emes, Túrkııada tigilgen kóshirme ekenin aıtty.