«Kúzetshige aınalǵan Almas О́teshov, aıaq kıimi jyrtyq Bolat Jumadilov»: Elimizge belgili sportshylar aıanyshty kúıge qalaı tústi

Tanymal jýrnalıst, qoǵam qaıratkeri Gúlmıra Ábiqaı elimize tanymal sportshylardyń aıanyshty halin aıtyp, bılikke janaıqaıyn jetkizdi. Gúlmıra Ábiqaı óz oıyn jelidegi paraqshasynda bildirdi, dep habarlaıdy  qandastar.kz     Skifnews.kz aqparat portalyna silteme jasap.

«Úlken sportqa kezinde ózim aýylda ósip jete almaı qaldym. Bıiktikke sekirgendi jaqsy kórdim. Kórshi-qolań, kóshedegi qorshaý-qorany qaldyrmaı sekirip, bosqa alaókpe boldym. Bizdiń aýylda esh úıirme, sekııa bolǵan joq.

Balamdy 3 jasynan dzıýdo, 4 jasynan fýtbolǵa beremin dep júr em…Keshegi ziltemirshiden kúzetshige aınalǵan Almas О́teshovty, búgingi tápishkesi jyrtyq Olımpıada chempıony Bolat Jumadilovty kórip, oıymnan aınyp qaldym. Adam sportty kótergenimen, sport adamdy kótermeıdi eken. Kók týdyń márede jelbiregenine el bolyp qýanǵanymen, sportshynyń basynan sıpamaıdy eken.

Jazda @irm.astana tegin kvota alýǵa kelgen samboshy chempıon qyzymyz Dınara da jylap edi. Respýblıkalyq, halyqaralyq jarystan talaı márte bas júldeni alǵanymen, dıplom-gúlden artyq syı bermepti. Kúresip júrip, qyz dáýrenim de ótti. Endi ana bola almaı qınalyp júrmin” dep egilip edi. Ehhh… otandyq sportqa bir janashyr kelmedi-aý. Kezinde tarıhshy-kompozıtor Arystanbek Muhamedıuly da basqaryp edi ǵoı», — dep jazdy ol.