Bilim

«Qujatym joq, mektepke bara almaımyn»: Jelide bazarda jumys istep júrgen 7 jasar balanyń vıdeosy tarady

Foto: vıdeodan kadr

Áleýmettik jelide Túrkistan oblysy Jetisaı qalasynda jumys istep júrgen 7 jasar balanyń vıdeosy tarady, dep habarlaıdy  qandastar.kz Skifnews.kz aqparat portalyna silteme jasap.

TikTok jelisinde jarııalanǵan vıdeodan kishkentaı balanyń arbamen aýyr zattardy súırep bara jatqanyn kórýge bolady. Vıdeo avtory balany toqtatyp, ne istep júrgen suraıdy. Bala ákesimen birge turatynyn, ózi 7 jasta ekenin, ózinen kishkentaı baýyry bar ekenin, qujaty bolmaǵandyqtan mektepke bara almaıtynyn aıtady. Sondaı-aq vıdeonyń sıpattamasynda balanyń anasy joq ekeni jazylǵan.

Oqý-aǵartý mınıstrligi balalardyń quqyqtaryn qorǵaý komıteti atalmysh vıdeoǵa qatysty pikir bildirdi. Komıtet vıdeodaǵy balanyń Túrkistan oblysynyń Jetisaı qalasynda turatynyn rastady.

Sondaı-aq komıtet jelidegi vıdeodan keıin eki balanyń da ýaqytsha turý úshin mamandandyrylǵan mekemege ornalastyrylǵanyn habarlady.

«Osy jaǵdaıdy retteý úshin memlekettik organ bekitken algorıtmge sáıkes arnaıy top jumyldyrylǵanyn habarlaımyz. 7 jasar bala men onyń baýyry qaýipsizdikte. Qazirgi ýaqytta quzyrly organdar balalardyń densaýlyǵyn tekserip, qujattaryn jáne barlyq quqyqtaryn qalpyna keltirý máselelerimen aınalysýda», – delingen habarlamada.

Balalardyń quqyqtaryn qorǵaý komıteti balalardyń anasynyń tiri ekenin málimdedi.

Ilmekter

Osy aıdarda

Dobavıt kommentarıı

Close