Қызмет бабында қаза тапқан әскери қызметшілерге қанша ақша төленетіні белгілі болды

Фото: freepik.kz

Жұмыс бабында қаза тапқан әскери қызметкерлерді жерлеуге бөлінетін қаржы көлемі белгілі болды, деп хабарлайды qandastar.kz

Қорғаныс министрлігі қызмет барысында қаза тапқан әскери қызметкердің мәйітін тасымалдау мен жерлеуге 314 560 теңге көлемінде қаражат бөлетінін мәлімдеді. Бұл туралы «Ашық НҚА» порталында жарияланған министрліктің қаулысында көрсетілген.

Аталған сома марқұмның денесін туған жеріне жеткізуге, жерлеу рәсімін ұйымдастыруға және құлпытас орнатуға жұмсалады.

«Әскери борышын өтеу кезінде қаза тапқан немесе қызметтік міндеттерін орындау барысында алған жарақатынан, контузиядан немесе ауыр сырқаттан қайтыс болған әскери қызметшілердің мәйітін тасымалдау, оны жерлеу, құлпытас жасау және орнату шығындары айлық есептік көрсеткіштің (АЕК) 80 еселенген мөлшері ретінде белгіленсін», – делінген құжатта.

Dalanews.kz жазғандай, құжатқа енгізілген өзгерістер артық анықтамаларды алып тастау мақсатында жасалған. Бұған дейінгі редакцияда «әскери жиындарға шақырылған әскери міндеттілер» деген тіркес болған, жаңа құжатта бұл сөздер алып тасталған.

Әскердегі өлім-жітім мәселесі

Қазақстанда әскери қызметкерлер арасында суицид оқиғалары жиі тіркеледі. 2024 жылы әскерде бірнеше өз-өзіне қол жұмсау деректері орын алды. Алайда Қорғаныс министрінің орынбасары Шайх-Хасан Жазықбаев бұл жағдайдың көбейгенін жоққа шығарады. Оның айтуынша, 2024 жылы мерзімді әскери борышын өтеп жүргендер арасында үш суицид қана тіркелген, ал келісімшарт бойынша қызмет атқарған әскери қызметкерлер арасындағы өз-өзіне қол жұмсау жағдайлары тұрмыстық қиындықтармен байланысты.

Депутат Константин Авершин әскерилер арасында құмар ойынға тәуелділік (лудомания) артып бара жатқанын айтып, көптеген сарбаздардың ойынқұмарлық кесірінен өз-өзіне қол жұмсайтынын алға тартты.