МӘМС бойынша жарна мөлшері артады

Фото: ашық дереккөз

МӘМС бойынша жарна мөлшері 5 есе артады, деп жазды qandastar.kz

Міндетті әлеуметтік медициналық сақтандыру бойынша заң жобасы әзірленді. Денсаулық сақтау министрлігі құжатты Мәжілістің әлеуметтік-мәдени даму комитетінің депутаттарына таныстырды. Бұған дейін айтқанымыздай, 2026 жылдан бастап тегін медициналық көмектің бір бөлігі сақтандыру жүйесіне өтеді де бірыңғай медициналық пакеті әзірленеді. Ресми тіркелген жұмыссыз азаматтардың МӘМС жарнасын жергілікті әкімдіктер төлеуге міндеттеледі.

Бұл шамамен 1 млн адамды жүйеге қосуға мүмкіндік бермек. Ал жоғары жалақы алатындар жарнаны көбірек төлейтін болады. Мысалы, қазір 1,5 млн теңге жалақы алатындар 17 мың теңге төлесе, келесі жылдан бастап 30 мың теңге аударуға міндеттеледі. Табысы жоғарылаған сайын жарна мөлшері де арттырылады. 3 млн теңге алатындар 60 мың теңге, 4,2 млн теңге табыс табатындар 85 мың теңге жарна төлейді. Бір сөзбен айтқанда МӘМС бойынша жарна мөлшері 5 есе арттырылады. Заң жобасын әзірлеушілер бұл әділетсіздікті жояды деген пікірде. Ал депутаттар құжатты әлі де пысықтау керек деп отыр.